Shillong Nailur 06: U Symbud Myntri Rangbah ka jylla uba dei peit ïa ka tnad PWD (R&B) u Bah Prestone Tynsong hynnin ka sngi ula leit biang sha nongbah Delhi ban leit tynruh ïa ki heh jong ka Ministry of Road Transport and Highway (MoRTH), National Highway Authority of India (NHAI) bad National Highways & Infrastructure Development Corporation Limited (NHIDCL) na ka bynta ban pynsted trei noh ïa ki surok bah kiba don hapoh ka jylla.
U Bah Prestone ula ïathuh ba ha kitei ki jingleit ïakynduh bad ki heh jong ka sorkar pdeng, la shim ïa ka rai ban pynsted noh ïa ka kam ki jam ban trei ïa ka surok na Shillong sha Dawki bad khamtam eh ban maramot noh mardor ïa kane ka surok kaba la sniew ban pynsuk ïa ka leit ka wan jong ki paidbah.
Ula ong ruh ba ha katei ka jingïalang la shim ruh ïa ka rai ban sdang ban maramot noh ïa ka surok bah National Highway-6 na Jowai-Lumshnong shaduh Ratacherra bad la khmih lynti ba ïa kane ka jingmaramot ïa katei ka surok yn sdang noh, naduh ka taiew kaban wan.
Ula pyntip ba la rai ruh ba naduh u Naiwieng mynta u snem, yn buh syndon da ka kompani ka ban peit ban khmih ïa katei ka surok bah baroh kawei.
Ha kane ka jingleit ïakynduh u Bah Prestone ïa ki heh sorkar, la synrang lang ïa u, da u Chief Engineer uba khmih ïa ka National Highway u CN Sangma bad u Superintendent Engineer National Highway u Bah Rilang Lyngdoh.
