Shillong, Naiwieng 30 : Ban ïakhun pyrshah ïa u drok kam dei satia tang ka kam jong ka sorkar hynrei ka donkam ïa ka jingïatrei lang jong baroh ki paidbah khnang ba yn lah ban rat dyngkhong syndon naduh tynrai ha ka imlang sahlang, ong u MLA ka Nongpoh, Bah Mayralborn Syiem.
Haba kren bad ki lad pathai khubor, u Bah Mayral u la ong, “Ka dei ka kamram jong baroh lang ban ïakhun da ka jingsngewkhia, kumta kum ki paidbah ruh ki dei ban kyndit bynriew noh ryngkat bad ki nongmihkhmat ban wad ki lad ki lynti ban pynsngewthuh paidbah bad shim ki lad ki lynti ban lah tehlakam ïa kane ka jingshyrkhei jong u drok.”
Shuh shuh u la ong ruh ba na ka liang ka sorkar ka la pyrshang lut ki lad ki lynti ban ïakhun pyrshah ïa une u jingdih uba la pynsniew dur lut ïa ka imlang sahlang baroh kawei bad kane ruh kam dei satia ka jingïakhun kaba suk namar ka ïa tyngkhuh lut ha baroh ki liang.
“Ka sorkar ka la shimkhia haba ïadei ban pynduh ïa u drok, ha kaba la sakhi ba bunsien la ïoh kurup ïa u drok da ki ANTF ha kylleng ki district ka Jylla, nalor ka jingpyrshang ka Sorkar Jylla la ïohi ruh ïa ka jingmih shakhmat ki dorbar shnong bad ki nongïalam shnong ban ïatreilang kumjuh ki kynhun trei mon sngewbha bad ki seng ban ïakhun pyrshah ïa u drok,” u la bynrap biang.
Halor ka jingduna ki jaka ban sumar ïa kiba kyrni dih drok, u Bah Mayral u la ong ba ka jylla ka donkam ban don noh ïa ki jaka sumar kiba la pynïaid hi da ka sorkar bad halor kane u la ong ba ka Ri Bhoi ruh ka la phah ka jingtyrwa sha ka sorkar ban don noh kawei ka jaka sumar ïa ki nongdih drok.
“Kaba nga sngewkhia mynta ka dei ïa ki jaka sumar na ka bynta kiba la ngop ha u drok bad kumta ka sorkar ka la dei ban wanrah ïa ki jaka sumar na ka bynta ki nongdih drok. Kum u nongmihkhmat nga la ju kren ba ngi don ïa ki jaka sumar jong ki kynhun shimet, hynrei ki dei kiba rem dor kumta kam dei kaba suk ïa ki longïing kiba duk ban phah sumar da kaba hap siew 7,000 – 15,000 tyngka shibnai,” u la ong.
U la ïathuh ba na ka bynta ka Ribhoi District la dep ban aiti ha u Deputy Commissioner ban thaw lad bad ban phah ïa ka jingtyrwa lyngba ka CSR projek na ka bynta ban don noh kawei ka jaka sumar ïa kiba la ngop ha u drok.
Na ka liang jong u, u la ïathuh ba ka kam mynta ka la ïaid shakhmat bad kumta ki khmih lynti ba la kumno kumno ha u snem ban wan kin sa ïoh noh kawei ka jaka sumar ha Ri Bhoi Distrik.
