Delhi, Naiwieng, 30: Uwei u briew u la shah kem ha ki bor pahara hadien ba u la kawang da ka kynja um ïa u nongïalam ka Aam Aadmi Party (AAP) u Arvind Kejriwal katba u dang ïalam ïa ka jingïaid paidbah ha Greater Kailash Assembly Constituency ha South Delhi, ha ka sngi Saitjaiñ.
U Kejriwal u la pynlong ïa ka jingïaid paidbah ne Padyatra ha ki bynta bapher bapher jong ka nongbah Delhi shwa ba ka elekshon sha ka Ingdorbar Thawaiñ jong ka Delhi kan sa long ha u bnai Rymphang.
Ki Pulit ki la ïathuh ba ki la kem noh ïa u briew uba donkti ha kane ka kam.
“U runar uba thombor ïa u Kejriwal mynta ka sngi u dei uba don bynta bad ka BJP,” la ong u nongïalam rangbah ka AAP u Saurabh Bharadwaj uba dei ruh u Myntri ka Sorkar ha Delhi haba thoh ha ka rynsan X.
Ka Myntri Rangbah jong ka Delhi ka Atishi ha u kyrwoh ba la thoh ha ka rynsan X ka la ong, “mynta ha ka por mynsngi mynshai, u nongkyrshan ka BJP u la thombor ïa u Arvind Kejriwal. Ka BJP ka la kyiuh lypa ba kan sa rem ha ka elekshon ha Delhi ha ka sien kaba lai. Ki nongïalam ka BJP, ki paidbah ka Delhi kin sa ai jubab ïa kane ka jingleh tatdor. Ha ka samoi ba ladep ki ïoh tang 8 seat, mynta ka kynti ki paidbah ka Delhi kin ai da u Nod ïa ka BJP.”
U nongaitktien jong ka BJP ha Delhi u Praveen Shankar Kapoor u la kynnoh ia ka jingjia shah kawang da ka kynja um ïa u Kejriwal ka dei “ka waiñ rim ha ka lwa snieh bathymmai.”
“Ki elekshon ki la long ha baroh kawei kari, bad ki nongïalam, la ki dei kiba bha ne kiba sniew, ka jingïashim bynta ka dei ban long ryngkat bad ki bor pahara. Hynrei, kum kane ka jingjia bym poi pyrkhat ka jia tang ïa u Arvind Kejriwal haba don ki elekshon Assembly,” u la ong.
“Ka Delhi BJP ka pynrem jur ïa baroh ki jait jingïakhih ba pynmih jingkulmar. Hynrei u (Delhi) President Virendra Sachdeva u ladep kren lypa ba u Arvind Kejriwal, uba don mynta hapdeng ka jingkhuslai, un leh ïa kaei kaei ka kaba rim, kumba la jia ka jingshah thab. Mynta, ka jingsuba ka la paw pyrthei shisha,” u la bynrap.
