Delhi, Naiwieng, 30: U Myntri ka Sorkar Pdeng uba khmih ïa ka tnat Kam Pohiing bad Cooperation u Amit Shah ha ka snig Thohdieng u la plie ïa ka DGsP/IGsP Conference 2024 kaba san phew khyndai ha Bhubaneswar, Odisha.
U Myntri Rangbah duh Narendra Modi un pynïaid ïa ki kam ha ka sngi kaba ar bad balai jong ka jingïalang.
La pynïaid ïa ka jingïalang ha ka rukom hybrid, bad la ïashim bynta da ki DGsP/IGsP jong baroh ki Jylla/UT bad ki heh duh jong ki CAPF/CPO katba ki ophisar na ki kyrdan bapher bapher ki la ïashim bynta lyngba ka bor internet na baroh ki jylla. U National Security Advisor, ki Myntri Khynnah jong ka Tnad Kam Pohiing, u Union Home Secretary ruh ki la ïashim bynta ha kane ka jingïalang.
Ha kane ka jingïalang, u Amit Shah u la pynkup burom Police Medal ïa ki ophisar jong ka Intelligence Bureau bad pyllait ïa ka kot jong ka Tnad Kam Pohiing halor ka ‘Ranking of Police Stations 2024’. U Shah u la ai khusnam ruh ïa lai tylli ki thanat ba biang tam.
Ha ka jingai jingkren, u Amit Shah u la ai khublei ïa ki nongpynïaid ïa ki kam pulit na ka bynta ka jingpynïaid ryntih ïa ki elekshon 2024 bad ka jingsdang ryntih ïa 3 tylli ki aiñ ba thymmai kiba ïadei bad ki kam beaiñ.
U Myntri u la pynpaw ka jingsngewhun ha kaba ïadei bad ki jingjop ba kongsan kaba la ïalam sha ka jingkiew ka jingshngaiñ ha Jammu and Kashmir, ka thaiñ shatei lammihngi bad ki jylla ba shah ktah ha ki kam pyntriem Left-Wing.
U Amit Shah u la ong ba ki 3 tylli ki Aiñ ba thymmai kiba ïadei bad ki kam beaiñ ki la wanrah jingkylla ha ki kam jong ka ri ha kaba ïadei bad ka jingleh pyrshah ïa ki kam beaiñ ha kaba la phai na ka jingpynshitom sha ka jingai ïa ka hok. U la ban jur ba ki aiñ ba thymmai ki ïadei bad ki jinglong tynrai jong ka India.
U la kdew ïa ka bynta jong ka jingwanrah ïa ka jingshngaiñ ban kot sha ka thong jong u Myntri Rangbah duh Narendra Modi na ka bynta ka ‘Viksit Bharat’ shuwa u snem 2047 bad ban long ka ïoh ka kot kaba lai ka jingkhlaiñ shuwa u snem 2027. U Myntri Kam Pohiing u la ong ba ka jingphaikhmat kadei ban long sha ki jingeh ba ïadei bad ka jingshngaiñ ha shilynter ka thaiñ khappud lammihngi, ka jingrung ki briew sha ka ri bad ki jinglong jingman jong ka kam pahara ha ki jaka sor. U Shah u la kyntu ban shim ïa ka sienjam ban ym don ka jingai lad bad ka jingpyntreikam ïa ka zero tolerance policy.
Ha ki ar sngi ban wan jong ka jingïalang, ki hehduh ha ki kam pulit jong ka ri ba kin pynkhreh ïa ka jingïaleh pyrshah ïa ki jingeh hakhmat ka jingshngaiñ jong ka ri, ba kynthup ki kam pyntriem Left Wing, ka jingshngaiñ ba ïadei bad ki khap duriaw, ki jingdih pynbuaid, ki kam beaiñ lyngba ka bor internet bad ka jingshngaiñ ha ka ïoh ka kot. Yn peit bniah ruh ïa ka jingïaid shaphrang ka jingpyntreikam ïa ki Aiñ ba thymmai kiba ïadei bad ki kam beaiñ bad ki sienjam bad ruh ki rukom treikam ba biang tam jong ki pulit ha kine ki ar sngi ban wan.
