Phai khmat ki paidbah sha ka Congress ban ïakhun ki kam bamsap ha ka jylla, ong ka Congress

Shillong, Naiwieng 30: Ka Working President jong ka Meghalaya Pradesh Congress Committee ka Deborah Marak ka la ong ba mynta ka la dei ka por ba hap ban ïakhun pyrshah ïa ka bamsap kaba la jur bha ha kane ka jylla bad dei halor kane ba ki paidbah mynta ki la ïohi bad phai khmat ba dei satang ka Congress kaba kot bor ban leh ïa kane ka kam.
Ïa kane ka la ong ha ka jingïalang pdiang sngewbha ïa ki dkhot ba thymmai bad kiba rim na ki 4 tylli ki constituency kiba la wan ban pynïasoh sha ka Congress ha ka sngi Thohdieng hapoh Congress Bhavan kiba dei na Sohïong Constituency, Mawthadraishan, na Jirang bad na Nongthymmai Constituency.
Ha kane ka jingwan ban pynïasoh da ki spah ngut sha ka seng Congress ki nongïalam ba hakhmat ka Congress ki la ong ba kane ka la ai jingkyrmen na ka bynta ban pynkhie im biang ïa ka Congress ha kane ka jylla khamtam ban pynkhreh ïa ka elekshon MDC ka ban long ha une u snem ban wan.
“Ki dang bun ki kam kiba ka seng kan dang hap ban leh bad mynta ki nongshong shnong ka jylla ki la sngewthuh watla ka long kaba la slem hynrei ngi sngewthuh ba mynta ngi donkam ban ïakhun pyrshah ïa ka bamsap, ka jingkiewdor shaba palat jong ki marbam bad ki tiar kiba kongsan bad ïa kane ngi lah ban leh tang da ka jingïatreilang,” ong ka Working President ka MPCC.
Ka la ong ba ïa mynta kan ym don shuh ka por ban ïakhun ïa kane ka kam bam sap bad kiwei ki kam kiba la ktah ïa kane ka jylla na ka daw jong ka jinghap ban ïakhun ïa ka MDC elekshon, kumta donkam ban pynkhreh khnang ban ïoh bun kiba jop ha kane ka elekshon.
“Ngi donkam ruh mynta ba hadien ka elekshon MDC ban ïakhun pat sa ïa ka MLA elekshon ka ban long ha u snem 2028 naba kane ruh kadei ka kam kaba kongsan bha ïa ngi ha kaba ngin lah ban wanrah ïa ki jingkylla ïa kane ka jylla kaba la shah kynnoh ba kadei kawei na ki jylla ba bamsap tam,” ka la ong.
Haba phai pat sha Garo Hills kane ka nongïalam ka la ong ba ki la jia ki juh ki jingjia ha kaba la ïoh ki jingkynnoh ba ki la don bun ki kam leh bakla da kane ka sorkar kumta sha kane ka thaiñ ruh mynta ka Congress kan hap ban trei shitom ban lum ban lang ïa ki nongshong shnong ba kin wan ban pynïasoh bad ka Congress.
“Sha Garo Hills ruh ngin sa pynlong kum kine ki prokram ban pynrung dkhot ïa kiba bun ngut kiba kwah ban pynïasoh sha ka Congress bad shen yn sa pynlong da ka jingïalang kaba heh ha kaba bun na ki briew kiba kwah ban long dkhot kin sa wan ha ki sngi ba la pynbeit da ka seng,” ong ka Deborah Marak.