Shillong, Naiwieng 30: Ka Myntri Sorkar pdeng ba dei khmih ïa ka Tnad Women and Child Development, Annapurna Devi ka la leit jngoh ïa ka Ri Bhoi District, Meghalaya mynta ka sngi ban peit bniah ïa ka jingpyntreikam ïa ki sienjam bapher bapher ba ïadei bad ka jingkyntiew ïa ki longkmie bad ki khynnah bad lum jingtip shaphang ka jingïaid shaphrang ka thaiñ hapoh ki skhim ba bei tyngka ka sorkar pdeng.
Kum shi bynta na ka jingleit jong ka, ka Myntri ka la sdang da ka jingleit jngoh ïa katto katne ki shnong ha ka district ha kaba ka la ïakren bad ki longïing ha ka Transit Home bad ïakren ruh bad ki longkmie ba armet ha ka Primary Health Centre ha Byrnihat.
Ka Annapurna Devi ka la leit jngoh ruh ïa ka Anganwadi Centre ha shnong Saiden, ha kaba ka la ïakren bad ki nongpeit ïa ka centre bad ki khynnah kiba pule ha ka preschool bad ki kam Supplemental Nutrition Programme (SNP).
Hadien kane ka Myntri ka la peit bniah ïa ka jingpyntreikam ïa ki skhim bad ïakynduh bad ki nongmihkhmat na baroh ki tnad bad ki bor pynïaid district ha DC Conference Hall ban peit bniah ïa ka jingpyntrei kam ïa ki skhim jong ka sorkar pdeng. Ki jingïakren ki kynthup ïa ki jingeh, ki jingjop bad ka jingïaid shaphrang ha ka jingtreikam na ka bynta ki thong ha u snem, ryngkat bad ka jingmang tyngka bad ka jingpyndonkam ïa ka pisa na ka NITI Aayog bad ka North Eastern Council (NEC), bad kiwei kiwei ki skhim bad ki sienjam.
Ka Myntri ka la ïaroh ruh ïa ki sienjam jong ka sorkar jylla, ba kynthup ïa ka Early Childhood Development Mission bad ka Chief Minister’s Safe Motherhood Scheme (CM-SMS), kaba pynthikna ban rah shakhmat ïa ka kam. “Kane ka sienjam jong ka sorkar kadei kawei na ki rukom treikam ba biang bad ngin peit kumno lah ban pynbud ïa kane ha kiwei kiwei ki aspirational district jong ka ri ban kyntiew shuh shuh ïa ka koit ka khiah jong ka kmie bad i khunlung.”
Ka Annapurna Devi ka la pynpaw ka jingsngew hun ïa ki jingjop jong ka district da kaba ong, “Ki dak ha kaba ïadei bad ka Ri Bhoi Aspirational Distrik ki long kiba ai mynsiem bha. Mynta, ka district ka don ha ki kyrdan ba kham halor ha ki dak kiba ïadei bad ki longkmie bad ki khynnah. Ka la pynthikna ruh ban weng ïa ki jingduna ha katto katne ki dak bad pynbeit ïa ki jingeh kiba la pyni ha kane ka jingïalang. Ka Myntri ka la ïaroh ïa ki sienjam jong ki ophisar ka jylla bad pynthikna ka jingkyrshan jong ka sorkar pdeng, da kaba ong ba kan rah shakhmat ïa ki jingtyrwa bad pynthikna ban buddien.
Haba kren shaphang ka jingphaikhmat jong ka sorkar pdeng ha kaba ïadei bad ka thaiñ shatei lammihngi hapoh ka jingïalam jong u Myntri Rangbah duh Narendra Modi, ka Myntri ka la ong, “Mynta, u Myntri Rangbah duh Narendra Modi u la peit bniah ïa ka thaiñ shatei lammihngi, bad la ïatreilang da baroh ki tnad kynthup ka tnad women bad child development.”
Ha kaba kdew sha ka jingjop jong ka Aspirational Districts Programme (ADP), ka Myntri ka la ong ba namar ki sienjam ba khlaiñ hapoh ki distrik ba shah ieh beiñ ha ki por mynshuwa, kynthup kito kiba don ha ki jaka kyndong, ki la wanrah ïa ka jingjop ha kaba ïadei bad ka jingkyntiew ïa ki dak ka roi ka par.
Ki ophisar na ka sorkar jylla bad sorkar pdeng ki la ïadonlang ha kane ka jingïalang, kynthup ïa u Sampath Kumar, Principal Secretary, tnad ka koit ka khiah, sorkar Meghalaya, u Pravin Bakshi, Commissioner & Secretary, tnad Social Welfare, sorkar Meghalaya, u Abhilash Baranwal, Deputy Commissioner Ri Bhoi, Dr Ankita Chakravarty, PS sha ka Myntri Tnad Women and Child Development, sorkar India, ka Malika Pandey, APS sha ka Myntri WCD, u Ram Puneet, Language PA sha ka Myntri, WCD, u Kumar Gaurav, Under Secretary sha ka Tnad WCD, bad kiwei kiwei.
