Shillong, Naiwieng, 30: Ki nongïalam jong ka BJP Meghalaya State Unit ki la durut bad trei shitom ban pynkut noh ïa ki kynrum kynram ha ka skulbah North Eastern Hill University (NEHU) hadien ba ki samla pule ki la pynlong ïa ka jingïakhih da ka jingkyrshan lang jong ki nonghikai ban dawa weng kam ïa u Vice Chancellor u Prof. PS Shukla halor ki jingkynnoh jingkynnoh pynïaid kam bakla bad ka jingbym ler treikam hapoh ka skulbah.
Ha u kyrwoh ba la phah ha ka sngi Saitjaiñ sha ki lad pathai khubor da u Chief Spokesperson ka BJP, Bah M. Kharkrang, u la ong, “da kaba bteng ban trei shitom ban weng ïa ki kynrum kynram hapoh ka skulbah NEHU ka kynhun jong ki nongïalam ka State BJP ba la lamkhmat da u Bah Alexander L. Hek ki la ïakynduh ïa u Lat ka jylla u CH Vijayashankar ha Raj Bhavan mynta ka janmiet.”
“Ka kynhun ka la ïathir ïatai bad u Lat halor ki lad ki lynti ba lah ban shim ban pynkut noh ïa ki kynrum kynram ha ka jingkren kaba la neh shi kynta,” u la ong.
“La pyntip ha u Lat ka Jylla ïa ka jingleit ba dang shen sha Delhi da kane ka kynhun bad ka State BJP kan ïai bteng ban trei shitom (na ka bynta ban pynkut ïa ki jingeh hapoh ka skulbah),” la bynrap u kyrwoh.
Kum ban shu pynkynmaw hangne, ka kynhun ba la thaw da u State President ka BJP Meghalaya, ba la lamkhmat da u MLA u Bah AL Hek uba long ruh u Myntri ka Sorkar Jylla, u Chief Spokesperson Bah M. Kharkrang, u General Secretary Dr. E. Myrshing bad u Executive Member Bah David Kharsati ka la shah bynshet ban khmih ïa ki kam ba ïadei bad ki kynrum kynram hapoh ka skulbah NEHU ha kaba ki la leit sha New Delhi ban ïakynduh ïa ki nongïalam ka BJP bad ïa u Myntri Khynnah ka Sorkar Pdeng u Dr Sukanta Majumdar.
Ka jingleit pynsngew ïa ki kynrum kynram hapoh ka skulbah NEHU ka long hadien ba ka kynhun ka la ïakynduh shwa ïa ki nongïalam ka NEHUTA bad ka NEHUSU ha nongbah Shillong.
Kane ka kynhun ka la pynsngew ha u Dr. Sukanta Majumdar ïa ki kynrum kynram kiba mih hapoh ka skulbah NEHU bad pynpaw ba la donkam ban pynkut noh mardor ïa kine ki jingeh na ka bynta ka bha ka miat jong ki samla pule bad kumjuh ruh ka skulbah NEHU.
