Wat ngeit ha ki Social media naba kin long mawjynthut ïa kam pynroi, ong u Bah Sanbor

Shillong, Naiwieng 30: U MLA ka 19th South Shillong Constituency u Bah Sanbor Shullai u la kyntu jur ïa ki nongshong shnong ban ym ngeit than ha ki khubor Social Media kiba ïalam bakla khamtam ha kine ki por kiba mynta naba kine ki jait khubor kin pynsniew ïa ka imlang sahlang bad kin long ki mawjynthut ïa ki kam pynroi.
Ïa kane u la ong haba pan ïa ka jingkyrshan na ki paidbah na ka bynta u pyrsa jong u, uban ïakhun ïa ka elekshon MDC ha u snem ban wan u Bah Ricky Shullai ha ki prokram pyllait skhim hapoh ka constituency kaba la kot sha ka T. 10.22 klur.
“Ki paidbah mynta ki dei ban pyndonkam hok ïa ki jingstad jong ki ban peit ïa ki kam ba la trei ym ban shu ïa shongshit ha ki khubor jong ki Social Media kiba la pynngeit jubor ïa ki bym dei ruh ban ngeit,” ong u Bah Sanbor Shullai.
U la ong ba kum u MLA uba la trei shitom ban wanrah bun ki kam pynroi ha kaba kiwei pat ki constituency kim ïoh, kumta ki nongshong shnong ruh kim dei ban kyntait ne ban iehnoh ïa u ha ka por ba la dei ban wan ban pan ki jingkyrshan khamtam ne na ka bynta u pyrsa jong u, uban ïakhun ïa ka elekshon MDC.
“Nga la suk bha mynta ba u pyrsa jong nga u la shimti bun ki kam haba ïadei bad ki kam pynroi, u la leit hi ban kynduh ïa ki ophisar haduh ki Myntri sorkar ban pynbit pynbiang ïa ki jingtyrwa skhim ba la ai da ki shnong bapher bapher, kumta kane ka la pynsuk ïa nga bad tang lada ki mad ne tyngkhuh ïa ki jingeh ki la pyntip sha nga,” ong u Bah Shullai.
Kumta u la ong ba lada u Bah Ricky u poi sha ka thong ka la pynsuk lypa ïa u ban pyndep ïa kiba bun ki kam bad ki jingdonkam jong ki nongshong shnong.
“Kiwei kiwei ki bun kam ban leit sha ka tamasa Cherry Blossom bad kiwei ki kam sngewbha, hynrei nga hi dalade ngam ju leit namar nga sngewthuh ïa ki jingdonkam ki paidbah bad kumjuh ruh ban durïap ïa ki kam kiba ka constituency ka donkam manla ka por,” u la ong.
U la ong ruh haba ki nongshong shnong ki stad da kaba ki jied hi ïa la u kpa la jong ki ïoh lut kat kaba ki pan hynrei lada ki jied ïa u kpanah daei un ai ïa ki.
“Kumta jied barabor ïa uba na la ïing la jong ne uba dei u trai shnong ym ïa uba nabar shnong naba uba na ïing u tip khambha ïa ki jingeh jong ka ïing la jong katba u ba nabar yn ym tip ïa kaei kaba ka ïing ka donkam,” bynrap u Bah Sanbor.