Buddien u CEM ka KHADC ïa ki kam u (L) Latiplang Kharkongor ha Nongthymmai Constituency

Shillong, Naiwieng, 30: Ban pynurlong ïa ka jingkular na ka bynta ban pynbit pynbiang ïa ki jingdonkam jong ka Nongthymmai Constituency, ki bahaiing hasem ryngkat ki nongkyrshan ba radbah jong u MDC ba la khladnoh ka Nongthymmai Constituency u Latiplang Kharkongor ha ka sngi Saitjaiñ la sam ïa ki top um syntex sha ki nongshong shnong kiba don hapdeng ka jingduk jingkyrduh hapoh ka Constituency.
Ha kane ka sngi, la synran lang ïa ki bahaiing hasem da u Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem, ki Rangbah Shnong na ki shnong kiba hap hapoh ka Nongthymmai constituency bad ki paidbah kiba sakhi lang.
Ki nongkren ki la pynpaw ba kane ka skhim ka dei kaba la wanrah da u Bah Latiplang Kharkongor shuwa ba un khlad noh na kane ka sla pyrthei bad kane ka dei ruh ka sien ba nyngkong ba yn don kum kane ka skhim shimet kaba wan lyngba ka KHADC.
Ki la pynpaw ka jingsngewnguh ïa ka iing ka sem jong u Bah Latiplang Kharkongor, ïa u CEM ka KHADC bad ïa ki nongkyrshan baroh kiba la buddien khlem sangeh ïa ka kam kaba dang sah khnang ban ïoh pyndep noh ïa ka jingangnud jong u Bah Latiplang Kharkongor.
U Bah Pynïaid haba kren ha ka jingïalang, u la ong ba la donkam ban don noh da ka iing shnong bad ban ainam ïa u Bah Latiplang Kharkongor khnang ba ki pateng ban dang wan kin tip bad kin ithuh ïa ka nam ka kyrteng jong u.