Shillong, Naiwieng 30: Ka tamasa kaba la ap la slem bad kaba dei kawei na ki tamasa ïaput ïatem kaba heh duh hapoh kane ka thaiñ shatei lammihngi ka la sdang naduh ka sngi Thohdieng ha kaba ïa kane ka tamasa la pynlong ha Garo Hills, Meghalaya.
Kane ka 4th Edition ka Me’gong Festival 2024 ka la sdang ha ka janmied jong ka sngi Thohdieng da ki prokram deiriti ba la pynlong ha Baljek Airport kaba ha West Garo Hills hajan Tura. Kane ka tamasa kadei ka jingpyni ïa ki jingim bad ka kolshor jong ki riewlum Garo da ka jingdonlang ki kynhun tem kiba kynsai jong ki ri ka pyrthei bad ki riew ieid jingrwai.
U Myntri ka tnat Tourism ka sorkar jylla u Bah Paul Lyngdoh u la long kum u kongsan ha ka sngi sdang ïa ka Me’gong Festival ha ryngkat bad u Ambassador jong ka Uzbekistan u Sardor Mirzayusupovich Rustambaev, u Ambassador ka El Salvador Guillermo Rubio Funes, Ambassador ka Jamaica Jason K M Hall bad kiwei kiwei kiba la shah khot sngewbha bad ki ophisar na ki tnat sorkar bapher bapher jong ka district kiba la shim bynta ha kane ka festival.
Lah ban kdew ba ka tnat Jngohkai kadei kaba la pynlong ïa kane ka Me’gong Festival bad ka dei ruh kaba la sdang da ka tnat Tourism, ka sorkar jylla. Ka jingthmu jong kane ka festival ka long ban kyntiew ïa ki kam jngohkai sha ka thaiñ Garo Hills Meghalaya da kaba wanrah ïa ka put ka tem bad ki riew ieid mariang na ka bynta bapher bapher jong ka ri India bad ki ri ka pyrthei sha kane ka thaiñ kaba itynnad bad kaba dei ka thaiñ kaba bun ki kolshor.
Ki kynhun nongtem bad ki nongrwai ha kane ka sngi ki dei Gajendra Verma, Euphoria, DJ Uditaa Goswami kynthup ruh ïa ki kynhun tem na ka thaiñ ka Haystack Ladies, Da Suraka ha ka sngi sdang ïa ka Me’gong Festival. Katba ha sngi kaba ar ka kynhun tem kaba pawnam ha ka pyrthei ka “EUROPE” ha ryngkat bad ka Indus Creed- ka rock band na Mumbai, Shanka Tribe, Restless Desire ki la pyni ïa la ki sap ki phong ha ka tem ka put ka rwai ka siaw ha sngi kaba ar jong ka tamasa. Shuh shuh ka la don ruh ka rynsan kaba la ka jong ne ka separate Day Stage (MGMP) kaba la aiti kyrpang ïa ka kynhun napoh Garo Hills kiba kynthup ïa ka kynhun Dopos, Murder in Space, Aransa, Ahaia, Strange Origins, bad kiwei.
Lah ban kdew ba ka tnat Tourism, ka sorkar Meghalaya ka la dep ban khot ïa artylli ki kynhun tem kiba paw jong ka pyrthei kiba kynthup ïa ka MLTR bad ka Big Mountain ha u snem 2022 ha kaba kiba wan sngap ki la poi kumba 2.6.lak ngut ha ki arsngi.
Kumjuh ruh ha u snem ba la dep ïa ka jingpynlong ïa ka Me’gong Festival ka la long kaba jop ha kaba ki nongwan jngohkai ki la poi kumba palat 3 lak ngut bad ki kynhun rwai kiba la wan pynsngewbha ki dei ka Vengaboys bad u Arman Mallik.
U Myntri Rangbah ka jylla Meghalaya, u Conrad K Sangma, u Lamphang ka Ïingdorbar Thaw aiñ ka Meghalaya u Thomas A Sangma, U Myntri ka tnat Jngohkai u Bah Paul Lyngdoh bad kiwei kiba la shah khot sngewbha ki la donlang ha ka jingpynlong ïa kane ka tamasa.
La ong ba kane ka Me’gong Festival 2024 kaba la buh ïa ka phang “Echoes of Tradition” ka la pynpaw sha ka pyrthei ïa ki jingriewspah ki kolshor bad ka deiriti jong ki riewlum Garo jong ka Meghalaya. Ki don ki jingshad tynrai, ki jingbam tynrai jong ki Garo, ki jingïalehkai ki mynbarim bad kiwei kiwei.
Kiwei pat ki kam ba ka khring ïa ki briew sha kane ka tamasa kidei ka Garo Handloom bad Handicraft, ka traditional Garo Culinary Showcase, ka rukom pyni shet jingshet, ka jingïakob bam, ka Model Garo Village, Activity Zone, Camping Zone, Stall arena, Light bad laser show nalor kiwei.
Kane ka tamasa ka la ïohpdiang bun ki jingjubab na ki riew ieid jingrwai bad kiba ieid tamasa kiba wan napoh ka ri bad ïa kane la sakhi da ka jinglah ban die ïa ki tiket na baroh ki bynta jong ka ri.
Kane ka tamasa kaba la pynlong ha kane ka snem kan ïalam ïa ka Garo Hills ban jan bad baroh ki jaka jong ka ri bad kumjuh ruh ka pyrthei bad ki nongwan jngohkai kin sa pynbna paidbah ïa kane ka jaka kaba la shong buhrieh ha kane ka jylla kaba itynnad bad lyngba kane kan kyntiew ruh ïa ka kolshor ki Garo sha ka pyrthei.
