Kaei kaba ka bor pynïaid district ka la leh ban tehlakam ïa ka jingkhrong pisa beaiñ ha surokbah?

Nongpoh, Jylliew, 23: Ka Ri-Bhoi People’s Council (RBPC) Seng Kmie ha ka sngi Thohdieng jong ka taiew baladep ka la leit ai da ka jingujor ha ophis u Deputy Commisioner Ribhoi District halor ka jingjur ki jingkhrong pisa ha shilynter jong ka surokbah National Highway ha Ri-Bhoi, khamtam ha Umling Weighbridge, kaba haduh mynta kam pat don kano kano ka jingshimkhia na ka sorkar bad khamtam ka bor synshar district, namarba ka pisa ka dei kaba la shu lum beaiñ bad rung sha ka pla jongno re jongno.
Ka seng mynta ka sngi ka la ap kumba shi kynta eiei ban ïakynduh ïa u DC ka Ri-Bhoi hynrei hadien ka jingioh kynduh u la phah noh ban ïakynduh ïa ki nongïalam ka seng sha ka kong BL Pakyntein Additional Deputy Commissioner ka Ri-Bhoi.
U samla Jayson Lennox Nongrum President ka RBPC u la ong ba kum ka seng ka dap da ka jingsngewkhia halor ka jingnang roi ka jingkhrong pisa ha Ri-Bhoi wat hadien ba ka la don ka jingujor na ka por sha ka por halor ka jingbamsap bad ka jinglum ïa ki jingdon jingem na ka district ha ka rukom ba khlem don jingkheiñ, ba la ju leh da ki riew shimet ne ki kynhun bapher bapher kiba don ha surok bah National Highway, ha ki Weighbridge bad ki surok PWD, hynrei haduh kine ki sngi ba mynta kam don kano kano ka daka ka shin ban tehlakam ïa katei ka jingshim kabu ban lum pisa na ki kali bapher bapher kaba kum ka seng kam tip mano ba ai jingbit ba kin khrong pisa.
Ha katei ka jingïakynduh bad ka kong BL Pakyntein ADC ka Ri-Bhoi ka jingïakren ka la long kaba seisoh bad na ka liang jong ka ka la pyntip ba kum kitei ki jingujor ki la don shibun, bad ka la don ruh da ka hukum ban ithuh ïa ki jaka bad ki kynhun hynrei kaba sngewsih ka long ba haduh mynta ngim shym la iohi ba kita ki jingkhrong pisa beaiñ kin kut noh ioh lehse ba ki bor district ki buhrieh ruh ngim tip ïa kata, la ong u samla Jayson.
U la ong ruh ba ka jingshlur jong ki samla ban mih sha madan ban lum pisa na ki kali ka mih ruh u dak jingkylli ba kiei kita ki jingpynbor ïa ki samla mynsngi mynshai bad mynsiet ban leh kitei ki jait kam bad ka jingdon ruh ki ba shim kabu kiba lum khajna khlem jingkheiñ, hato ka don ka jinglaitlan ki kali ba kit ïa ki mar bapher bapher, ne ioh lehse ba kita ki kali kit mar ki leh bakla ba ki hap siew pisa, hynrei lada ki bakla kaei kaba ka bor district kan leh ban tehlakam ïa ka jingkhrong pisa?
Ka jingleit kynduh jong ngi mynta ka sngi ka long ban buh ka jingkylli sha ka bor district kaei ba ka la leh ban tehlakam ïa ka jingroi jong ki riew shimet, ki kynhun bad ki riew shim kabu ban khrong pisa, hooid na ka liang ka bor district ki la trei ïa ka kam hynrei kam pat biang, namar ka jubab ba ioh na ki ka long ba kim ioh ïa kum kita ki briew bad kita ki kynhun tang lada leit ki la phet noh, ka long kaba suk ïa ki ban jubab hynrei kum kata ka rukom treikam ka jong ki? La buh jingkylli utei u nongïalam seng sha ka bor district bad kane ka jingkren ka dei ka jingkren khyllung khynnah.
Ngi don ka jingshaniah ha ka bor pynïaid district bad lehse lada ki trei shisha tang hapoh 24 kynta ki la lah ban ithuh ïa kita ki briew, bad kane ka jingleh jong kita ki briew ka dei kum ka jingpynbeit, bad lada ka bor district kam pyni ïa ki kam ka pynkha ruh ïa ka rukom pyrkhat ba bun rukom bad suba sniew ïa ki ophisar ioh ki don bynta bad kita ki kynhun, namar katei ka ADC ka ong ba ki la don shibun ki jingujor hynrei balei kine ki jingujor ki mih man ka sngi lada ki bor district kin shimkhia ïa ka jingujor bad trei hok ïa ka kam hynrei namar ba ki bor district kim shym leh eiei dei namarkata ka daw ki jingujor ki mih man ka sngi bad man ka por, la bynrap utei u samla.