Ka Tuberkmaishnong kum ka Model Village, pynïoh u DC da ka kali kit ñiut elektrik

Khliehriat, Lber, 03: Ka long kaba sngewphylla ban tip ba ka jaka theh ñiut ha ka shnong Tuberkmai-shnong East Jaiñtia Hills District kam don satia kano kano ka jingsma iwtung kaba mih na ki ñiut kiba la lum thup bad ki nongtrei kiba trei ha kane ka jaka theh ñiut ki shimkhia bha ban pynïakhlad ïa ki ñiut bad pynthikna ruh ba kim dei bad tuid pathar sha ki um ki wah kiba don hajan ka jaka theh ñiut.
Ha kane ka jaka theh ñiut ha Tuberkmai-shnong, ki don ar ngut ki longkmie, ka Kong Thliangmon Sana bad ka Kong Tiknabha Phawa kiba pynïakhlad ïa ki ñiut kiba pyut bad ki ñiut ki bym pyut bad kiba shimkhia bha ban lum ïa ki ñiut ha ka rukom kaba beit bad ba ryntih bha. Ïa kine ki arngut ki longkmie la siew tulop da ka Dorbar Shnong Tuber Kmai-shnong.
Haba ïakren bad u Mawphor, u Waheh Shnong ka Tuberkmai-shnong Bah Miki Lyngdoh, u la ïathuh ba ka Dorbar Shnong ka don jingthmu ban thungkam shuh shuh ïa ki briew ha kane ka jaka theh ñiut namarba ka kam ka long kaba bun.
U Bah Miki Lyngdoh u dei ruh u briew uba sngewtynnad bha ban pynneh pynsah ïa ka khuid ka suba ha ka shnong ka thaw, kumjuh ruh ki nongshongshnong ki dei kiba ju ai ka jingaitreilang manla ka por bad ka Dorbar Shnong ban wanrah ïa ka jingkhuid jingsuba.
Hapdeng kine ki jingïaid lynti, ka shnong Tuberkmaishnong ka la shah jied kum ka Model Village bad lyngba kane, u Deputy Commissioner jong ka East Jaiñtia Hills District u Abhilash Baranwal u la pynïoh ïa ka jaka theh ñiut kaba bit ba biang bha hapoh shnong kumjuh ruh ka kali kit ïa ki ñiut na ki ïing ki sem kiba don hapoh shnong.
Kane ka kali kit ñiut ka dei ka bym pyndonkam ïa ka umphniang Petrol ne Diesel hynrei la pynïaid da ka bording elektrik bad ïa u nongñiah ïa ka kali ruh la siew tulop da ka Dorbar Shnong, la ïathuh u Waheh Shnong.
“Nga sngewtynnad bad sngewkmen bha ba kane ka projek ka wanrah ym tang ïa ka khuid ka suba hynrei ka wanrah ruh ïa ki lad ïohkam ïohjam ïa ki nongshong shnong,” la bynrap u Bah Miki Lyngdoh.
Ki longkmie kiba trei ha ka jaka theh ñiut ki la ïathuh ba ïa ki plastik kim ju thang hynrei ki lum shi jaka, ki thang ha ka ding tang ïa ki dieng lyngkhot lyngkhai, ïa ki ñiut kiba pyut kum ki snep jhur ki buh shi jaka ba kin ïoh pyut ban ïoh pynkylla sboh.
“Ngi sngewtynnad ba ngi trei hangne bad ha kane ka jaka kam don satia kano kano ka jingsma iwtung watla ki ñiut ki wan poi na ki shnong ruh hynrei ym don jingsma. Ngim da donkam eh ban pyndonkam ïa ki Mask (jingda khmut) namarba kam don ka jingsma iwtung bad ngi khmihlynti ba ngin neh ha kane ka kam,” la ong kine ki arngut ki longkmie.
Ki la ïathuh ba ki ñiut ki ju poi ar sien shi taiew bad haba poi ki ñiut ki ju pynïakhlad noh ïa ki kiba pyut bad ki bym pyut la ka jong bad ki lum bha shi jaka, ki don ruh ka jingthmu ban shna ne pynmih sboh na ki ñiut kiba lah ban pyut ha kaba ïa ka sboh lah ban pyndonkam da ki nongrep kiba don hapoh shnong ban pyndomkam ha ka thung ka tep.
Ïa ki ñiut ki bym pyut kum ki plastik bad ki bitor la lum bad thep bha shi jaka khnang ban dup pynpoi ïa ki sha ka jaka ba dei ban pynpoi, namarba ka shong ka ju phah ïa ki ñiut sha ka karkhana pynmih dewbilat jong ka Dalmia Cement kaba don ha Thangskai ban thang ïa ki ñiut ha ka pajwa barhem khnang ba kan ym pynjakhlia ïa ka mariang.
Ki longkmie ki la ïathuh ruh ba la siew tulop ïa ki da ka dorbar shnong bad ong ba ka la long ka jingmyntoi shibun eh ïa ki ban pyndap ha ïing ha sem bad ki la pynpaw ruh ba ki trei ïa ka kam da ka mynsiem kaba kmen.