Ha ka jingïalang paidbah ha Byndihati EJHD, aiti u Shylla ha ka rai ki paidbah ban rung sha ka BJP

Khliehriat Nailur 16: U Bah Kyrmen Shylla, uba dei u MLA jong ka 6-Khliehriat Constituency haba kren ha ka jingïalang paidbah kaba u la khot pynlong mynta ka sngi ha Byndihati, East Jaiñtia Hills District, hadien ba u la pynsngew ïa kiei kiei baroh u la aiti bad shaniah ruh ha ka rai jong ki paidbah nongkyrshan jong u ba kin rai ïa ka jingleit rung seng jong u sha ka party BJP bad ha kane ka jingïalang paidbah la sakhi ruh ba ym shym la don mano mano ruh kiba pyrshah ïa ka jingthmu rung BJP u bah Kyrmen Shylla.
Ha ka jingïalang u bah Kyrmen Shylla u la pynshai ruh sha ki paidbah jong ka 6-Khliehriat Constituency halor ki khubor kumba la paw ha ki pathai khubor bad u la ong ba ha ka jingshisha ka jingleit jong ki dkhot ka UDP sha Delhi ka dei halor ki mat ba ïadei bad FCRA, ka MRSSA, ki mat ba ïadei bad ka them motor lane ka harijan Colony bad ka jingpynrung ïa ka ktien khasi hapoh ka 8th Schedule, nalor kine ki mat, u bah Kyrmen u la pynpaw ruh ha u Amit Shah, uwei na ki nongïalam ka BJP ha Delhi ha kaba ïadei bad ka kam dewïong bad kyllli ruh ba lano yn plie noh ïa u dewïong ha ka jylla Meghalaya bad la iakren ruh halor ka Land Custom.
Kum u nongmihkhmat, na ka thaiñ, u bah Kyrmen Shylla, u la pynpaw ka jingsngew khia halor ka jingkynduh jingeh ki paidbah na ka daw ba shah khang ban tih bad shalan dewïong namar ki paidbah kiba na Jaiñtia khamtam na East Jaiñtia Hills District ki dei kiba ju im da kaba trei dewïong, u la bynrap shuh shuh ba watla ka la don ka lad ban tih dewïong da ka Open Cast Mining hynrei ïa kane yn ym lah ban pynurlong namar ka bun palat ka jinglut bad ka jinglong jingman ka jaka ha ka thaiñ ruh kan iahap ban leh ïa kane ka Open Cast Mining bad ka long kaba eh ruh ban bud ïa ki aiñ ki kyndon kiba don hapoh kane ka Open Cast Mining.
Shuh shuh la pynsngew sha ki paidbah ba u nongialam ka BJP, u Amit Shah u kwah ban don la kumno kumno san ngut ki MLA ka BJP hapoh ka jylla ban ioh ban pynurlong ïa ki jingdawa ki MLA ka UDP bad ruh ban ioh plie noh ïa u dewïong, la ong ruh ba ha kato ka sngi ba ki iakynduh ïa u Amih Shah ka la don ka jingtyrwa na u Amit Shah ïa ki MLA ka UDP ban rung noh sha ka party BJP, hynrei na ka liang u bah Kyrmen Shylla lem bad kiwei pat ki MLA ka UDP ki khlem pat shim ïa kano kano ka rai bad ki la pan por na ki heh ka BJP.
Haba kren halor ka mat ba ïadei bad ka jingpynrung ïa ka ktien khasi hapoh ka 8th Schedule, u bah Kyrmen u la ong ba kane ka long kaba donkam namar ki khun samla kiba don ha ki jingpule bapher bapher kin ioh ïa ka lad ban thoh ïa ki exam ha ka ktien khasi, kum ka exam UPSC bad kiwei kiwei ki exam “haduh mynta ngim ioh IAS shuh namar ka eh ban iakhun bad kiwei pat ki jaitbynriew namar kiwei kiwei ki iohlad ban thoh ïa ki exam da ka ktien lajong, kumta lada kane ka jingdawa ka urlong kan don ka lad ban kiew shakhmat da ka jingiohlad ban thoh ïa ki exam da ka ktien khasi la jong” ong u bah Kyrmen.
La pynshai shuh shuh ba ha ka jingleit Delhi ki MLA ka UDP ki la iakren ruh halor ka mat ba ïadei bad ka status jong ki seng niam jong ki rit paid kum ka seng niam khasi bad seng niam tre, la iakren ruh halor ka Land Custom namar kane kan iarap ha ka khaïi ka pateng ban ioh ka lad ban khaïi ia ki mar pohkhyndew.
U bah Kyrmen u la pynshai shuh shuh ba kane ka jingthmu ki MLA ban ïashoh sha ka party BJP kam dei ba satia ba ki don kano kano ka daw sniew ne jingiasniew bad u nongialam ka party UDP ne bad ka sorkar MDA ne bad u Conrad Sangma ne bad ki myntri sorkar, hynrei ka dei na ka daw ka jingbit jingbiang jong ki paidbah.
Kiba la ai jingkren ha ka jingïalang ki kynthup u waheh shnong Tuber kmaishong, u bah Jiedlang Sana, Waheh Shnong Ladrymbai Dongwah, bah Deibor Suchiang, MDC barim na Bataw, bah Joinriwell Pyrtuh, bah Leo Siangshai, bah Graham Lyngdoh, kong Semi Khongthiang bad kiwei kiwei bad ki la pynpaw ba kim don kano kano ka jingpyrshah lada u bah Kyrmen u leit sha ka party BJP, la sakhi ruh ba ki paidbah kiba na ki shnong bapher bapher ba hap hapoh ka 6 Khliehriat Constituency ki la ïa poi lang sha kane ka jingïalang bad kum ka dak ka jingkyrshan ïa u nongmihkhmat ki paidbah ki la rah kti bad kam don kano kano ka jingpyrshah na ka liang ki paidbah.
Ïa ka jingïalang la pynïaid da u MLA barim jong ka Khliehriat, u bah Justine Dkhar.