Mairang, Nailur16: Ha ki por ba mynshuwa ka ri lum Khasi Jaiñtia ka dap da ki khlaw ki btap kiba rben ha kaba ki sim ki doh, ki mrad ki mreng kiba rit bad ba heh ki kynrei bad ki don kyrhai. Nalor kata ki don ki khlaw adong, ki khlaw shnong, ki khlaw kur, ki khlaw Lyngdoh. Katba ki snem ki nangïaid ki khlaw ki la nang synlen.
Haba phai ha ka jingdon ki khlaw dei ka hima Mawïang kaba hap ha Eastern West Khasi Hills district kaba dang don ïa ki khlaw kiba rben bad kitei ki khlaw ki dei ka khlaw jong ka hima Mawïang kaba la peit ban khmih da ka tnad khlaw jong ka Khasi Hills Autonomous District Council kaba don ha shilynter jong u lum Mawthadraishan shaphang shatei na ka surokbah National Highway 44 (E) Shilong – Tura bad ka jingheh jong katei ka khlaw ka don ym duna ïa ka shiphew square kilomitar ha kaba ïa ka tnad khlaw jong ka KHADC naduh mynshuwa ka la thung da ki nongpeit nongkhmih ïa katei ka khlaw ban lait na ka jingpom dieng pathar, wiang ding ha ka por tlang, pynïap dusmon ïa ki sim ki doh, ki mrad ki mreng bad ki jingthaw ba im kiba don ha katei ka khlaw.
Katkum ka jingïathuh jong ki nongpeit nongkhmih ïa katei ka khlaw la ong ba ki don ki kynja jakoit kiba phylla ïapher bha na kiwei pat ki jait jakoit bad ki mih tang ha ka por tlang. Nalor kata ki la ïathuh ruh ba ki mrad ba ki ju iohi ha katei ka khlaw ki dei ki bshad, ki diengkhied, ki khlathapsim, bad kiwei kiwei ki jaitmrad kiba ïasyriem bad ki bshad bad ki kynja ksar.
Kawei pat ka khlaw kaba kham heh kaba don ha katei ka hima ka dei ka khlaw Lyngdoh jong ka kur Lyngdoh Nonglait kaba sdang naduh shnong Umkrem haduh Teihnongbah, Lawbyrtun, Mawkyllei, Nonglait haduh Rngisawlia. Katei ka khlaw ka dei kaba ka kur Lyngdoh Nonglait ka la sumar naduh hyndai hynthai bad kam ju shah ïano ïano ban pom pathar ïa ki dieng na katei ka khlaw bad la shah tang ïa ki trai shnong lada ki donkam dieng bad shna ïng shna sem, shna ïngskul, ïngmane, bad shna synduk ïap briew lada don kiba ïap hapoh shnong.
Kum ban pynkynmaw ba ïa katei ka khlaw dei u (L) Maieit Hopingstone Lyngdoh uba long u basan jong ka kur Lyngdoh Nonglait uba la pynsngewthuh ha ka dorbar kur ba dei ban sumar bad pynneh pynsah ïa katei ka khlaw pateng la pateng. Katkum ka jingïathuh khan pateng la ong ba pdeng jong katei ka khlaw ha ka lynti ïaid kjat na ka shnong Lawbyrtun sha ka shnong Umkrem u don uwei u mawsiang uba heh bha harud lynti bad ha ki por mynhyndai ki ju don ki riew sniew kiba apthap ïa ki nongleit nongwan ha katei ka jaka khamtam ha ka sngi ïew Markasa namar ki briew ki leit siew leit tda na katei ka ïew.
La ong ruh ba ki riew sniew kiba ap thap ha katei ka jaka haba la poi ki briew lada ki mut ban kynrup ne beh ïa ki kim lah ïeng shuh na ka jaka ba ki shong bad ki sah kut ha ka jaka ba ki shong bun bun sngi haduh ba uta u ryngkew u basa uba don ha katei ka khlaw un da pyllait ïa ki. Kumta na ka bynta ban pynneh pynsah ïa katei ka khlaw ka kur Lyngdoh Nonglait haduh kine ki sngi kam pat shah satia ïano ïano ban pom pathar ïa katei ka khlaw.
