Ngin pyrshang noh sa ban long ki nongaikam ym ban shu wadkam sah: MDC Rambrai

Nongstoiñ, Nailur 16: Haba kren kum u Kongsan ha ka lympung jong ka ‘Kyrsiew Pynroi Agrofarming Development Organization’ lyngba ka CM Skills Mission hapoh Meghalaya State Skill Development Society, kaba la long mynta ka sngi ha Nongkroh Rambrai, u MDC ka Rambrai Jyrngam u Bah Lurshai Kharbani, u la ong ba ka por ka la dei ban pyrshang noh sa ka ban long ki nongai kam ym shuh ban ïai long sah kiba wad kam.
U kongsan u la ong ba kane ka dei ka juk kaba hiran ha ka kamai kajih, ki samla kim dei shuh ban ap khmih lynti tang ha ki kam sorkar namar ka shem jingeh. Hynrei da ka kam rep kam riang bad kam ri jingri kan long ka lad ban ai kam ïa kiwei pat.
U la ong ba ki don ki lad ki lynti bad ki kabu kum na ka Meghalaya State Skill Development Society, ha kaba ki nongrep ki lah ban ïoh ki jingïarap bad kyrshan dalade ïalade bad ban kyrshan lem ïa kiwei ruh kumno ban kamai kajih bad ban ïeng ha la ki jong ki kjat. Namarkata, u la ai mynsiem ba ki nongrep bad kiwei ruh ki bym pat donkam donjam, ba ki dei ban ieng joit bad ban trei shitom khnang ban kyntiew dalade ïalade bad ïa kiwei ruh.
Ha kane ka sngi, ka Kyrsiew Pynroi Agrofarming Development Organization, ka la ïoh ban sam ïa ki syrnod sha ki 30 ngut ei ei kynthup ïa ki shynrang bad kynthei kiba dei ki nongshah hikai ha ki kam ban pynmih jingbam mrad, ha ki kam ri jingri, thung jingthung kaba katkum kane ka juk stad kaba mynta.
Ka jingthmu ba kongsan jong kane ka prokram ai jinghikai kaba dei ruh kaba la khmih lyngba ka scheme jong ka Meghalaya State Skill Development Society (MSSDS), kaba la neh kumba 45 sngi ei ei, ka long ban ïarap ïa ki paid nongshong shnong ka thaiñ Rambrai, ba kin nang ban pynheh ïa ka kamai kajih jong ki, ban pahuh ka kam ka jam bad ba kin ïaineh ha ki shnong ki thaw ba ki shong ki sah bad ba kin ym kyrduh ha ka bam ka dih wat haba wan ka jingjia pakhang surok na ka thaiñ Assam.
Ha kane ka sngi nalor u bah Lurshai Kharbani MDC ka Rambrai Jyrngam kum u kongsan, la don ryngkat ruh u bah K. Kharmawlong Officer jong ka MSSDS West Khasi Hills, bah Boney Kharbani President ‘Ka Kyrsiew Pynroi Agrofarming Development Organization’ bad kiwei kiwei ki riew rangbah jong ka thaiñ Rambrai.
Ïa katei ka jingïalang la pynïaid da ka kong M. Suchiang kum ka shongknor bad la pynlong ïa katei ka jingïalang ha St. John Higher Secondary School, Nongkroh-Rambrai, West Khasi Hills District.