Noh synñiang u MP Rajya Sabha 10 lak ban pynitynnad ïa ki jaka jngohkai ha Nongjrong

Shillong, Lber 03 : U MP ka Ïing Dorbar Thawaiñ Rajya Sabha na ka Jylla Meghalaya, u Dr W R Kharlukhi u la mang pisa 10 lak tyngka na ka skhim MP jong u ban shna ïa ka jaka jngohkai ha Rit Lwai ha ka shnong Nongjrong hapoh Mawkynrew Constituency.
Kane ka jingnoh synñiang u Dr Kharlukhi ka la long myn ha ka 02 tarik u Lber, 2024 ha ka jingleit jngoh ïa katei ka shnong ha ryngkat ka jingïadonlang u Bah Banteidor Lyngdoh, MLA ka Mawkynrew, u Bah G Dhar, BDO ka Mawkynrew C&RD Block, ki ophisar, ki nongïalam shnong lem ki riewrangbah.
Kum ban shu kdew ba ka shnong Nongjrong ka la paw sha khmat ha ka jingkhring ïa ki nongshangkai pyrthei namar ka jingdon ïa ka jaka peitkai ba ki kjat sngi ki itynnad bha ha ka por mih sngi mynstep halor u lyoh ha ki them ka Wah Umngot kaba ker pyllun ïa katei ka shnong.
U Bah Banteidor da kaba ai khublei ïa u Dr Kharlukhi, u la ong, “Nga dap da ka jingsngewnguh ïa ka jingwan ïuh kjat u MP Rajya Sabha ba don burom ha kane ka shnong kumjuh ïa ka jingai jingïatreilang jong u ban kyntiew ïa ka kam jngohkai pyrthei ha ka thaiñ”.
U la ong ba ka jingnoh synñiang u MP Rajya Sabha ka long ruh hadien ka jingsakhi jong u ïa ka jingjop ka tamasa Escape To Nongjrong ïa kaba la dep pynlong ha ka 16 bad 17 tarik u Rymphang, 2024 harud ka Wah Umngot.
Shuh shuh, u Bah Banteidor u la kyntu ïa baroh kiba ïa don bynta ban ïa snohkti lang ban kyntiew ïa ka kam jngohkai ha ka thaiñ namar ka dei hi ka bynta jingtreikam kaba lah ban wanrah ki lad ïoh kam ïa ki khun samla bad kyntiew ruh ïa ka ïoh ka kot.
U MLA u la pyntip ba u la dep ïakren bad u Myntri Rangbah ka Jylla, u Conrad K Sangma ba un noh synñiang na ka bynta ka jingshna ïa katei ka jaka jngohkai bad u ruh un noh synñiang ban shna ïa ka da kaba mang pisa na ka skhim MLA.
U Bah Banteidor, uba bat ruh ïa ka kam kum u President ka Mawkynrew Tourism Sociable Society (MTSS), kaba la jop ha ka ban pynlong ïa ka tamasa Escape To Nongjrong bad kaba khmih ïa ki kam ban kyntiew ïa ka kam jngohkai ha Mawkynrew, u la ong ba ka Society kan shna ïa ka Information Centre ha ka jingïatreilang bad ka tnad Tourism ka Sorkar Jylla na ka bynta ka jingmyntoi ki nongwan jngohkai.
“Na ka Society ngin pyrshang ban ai jinghikai ïa ki samla ha ki bynta bapher bapher kiba ïa dei bad ka kam jngohkai pyrthei ba kin long ki lad kamai na ka bynta ki khun samla”, la ong u Bah Banteidor uba la ai khublei ruh ïa baroh kiba la don bynta ha ka ban pynlong ïa ka tamasa Escape To Nongjrong kaba jop bad kaba shongkun shi katdei.