Shillong, Lber, 03: Ha kine ki sngi la ïohi ba ïa ka jingtrei ïa ka surok nakhmat jong ka ophis ka Meghalaya Public Service Commission (MPSC) ban poi shakhmat ka ophis jong ka Passport Ophis kaba la sdang ha u snem 2022 ha Lower Lachumier mynta ka la sangeh biang.
Hynrei ïa kane ka jingtrei ka la sdang ha u snem 2022 kaba dei ruh kaba la jan kut snem bad ynda poi hakhmat jong ka skul All Saint ka la sangeh bad kane ka la pynlong ïa ka Myntri ka Koit ka Khiah ka Dr.Ampareen Lyngdoh ban leit ban jurip ïa kane ka jaka bad hadien kane ka la sdang biang ka jingtrei.
La ïohi ba ka jingtrei ka la ïaid beit haduh ban da poi shakhmat ka ophis jong ka Passport Ophis hynrei sa ban mih sha surok kane ka jingtrei mynta ka la sangeh biang, kane ka jingsangeh ka la buh ïa kiba pyndonkam ïa kane ka surok ha ka jingeh namar ki don ki ophis sorkar ha kane ka surok kiba pyndonkam ïa kane ka surok ban leit ban wan.
Halor kane la ïohi ruh ba ka jingsangeh ïa ka jingtrei kaba dei jong ka Smart City ka dei ka jaka ïeng kali kaba ha Motphran kaba la dep ban pynpra bad mynta ka jingtrei kala sangeh ha kaba ïadei bad kane ka jaka ïeng kali.
Ïa ki daw jong kane ka jingpynsangeh ban pyntrei ïa katei ka jaka ïeng kali ha Motphran ym pat lah satia ban tip.
Kane ka jaka ïeng kali ha Motphran hadien ba la dep ban pynpra la ïohi pat ba mynta ka la sah ha ka jingkhong reng bad ba la shu iehnoh kumto.
Kiba bun na kiba ju pynïeng kali ha kane ka jaka khamtam kito kiba ju kamai sha Jaïaw, Polo, Lamali bad kiwei ki la pynpaw ïa jingsngewkhia halor kane ka jingpynsangeh ïa ka jingtrei namar ba ki la ong ba lada la lah ban pyndep kloi ïa kane ka jingshna kan long ka jingmyntoi ïa baroh.
