Shillong, Lber 03: Ki pulit ka Jylla ki dang trei shitom mynta ban kthong ïa ka jingpyrshang jong ka kynhun lehnoh GNLA ba la pynduh ba kan ym lah ban khie khlieh biang.
“Ngi dang buddien mynta bad ngi dei ban lah ban pynpra biang ïa ka jingpyrshang jong ki ban khie khlieh biang,” ong uwei u heh pulit.
“Ngi suba ba dei ki dkhot ba la rim jong katei ka kynhun kiba donkti ha katei ka kam namar dei ma ki kiba tip bad ïoh ruh ïa ki tiar siat bad kiwei kiwei,” u la ong.
Hynrei u la ong pat ba bun na ki tiar ïaleh jong ka GNLA la dep ïoh kurup lut ha ki snem ba la dep, kata kynthup ïa kito kiba buhrieh bad don ruh kiba ki pyrshang ban die noh.
La ïathuh ba na ka liang ki pulit ki dang peitngor bad buddien ïa kito ki dkhot ba la pyndem wait hadien ba la mih khubor halor ka jingkhie im biang jong ka GNLA.
Dang shen u Symbud Myntri Rangbah ka jylla ba dei peit ïa ka tnad Kampohiing ka jylla, Bah Prestone Tynsong u la ong ba ka tnad pulit kan shimkhia ban pyntikna ba ka GNLA kan ym lah ban khie khlieh shuh ha rilum Garo.
“Ka tnad pulit ka jylla ki la peitngor bha bad ngin pyntikna ba kane ka kynhun kan ym lah ban khie khlieh shuh,” ong u Bah Prestone Tynsong.
