La pynthikna u Amit Shah ban wan pynïasoh ki 8 ngut ki MLA ka UDP sha ka BJP ong u bah Hek

Shillong, Nailur 16 : U Nongïalam ka BJP Bah AL Hek ha ka sngi Balang ula ong ba ka jingthmu pynïasoh ki 8 ngut ki MLA ka UDP sha ka BJP ka dei kaba la thikna haba pynpaw ba u Myntri kam Pohïing u Amit Shah da lade ula ai ïa ka dak kaba shai.
“Nga la ïakynduh para marwei ïa u Myntri kam Pohïing u Amit Shah bad ula kren shai ba kane ka dei kaba la thikna” ong u Bah Hek haba bynrap ba ki jingdawa ba la buh da ki MLA ka UDP ka dei kaba la kyrshan pura da ka BJP.
U Bah Hek ula pynpaw ba ki mat ba la pynsngew da ka UDP ki dei kiba dei hok shisha bad ki dei na ka bynta ka jingmyntoi ka Jylla. “Ha ka jaka ka ILP, ngi lah ban jied noh da ka MRSSA. Ka ktien Khasi ha ka Khyrnit ba Phra ka dei kaba hap pynrung. Baroh kine ngi hap ban burom, kine ki jingdawa ki dei kiba shonghok” ula ong.
“Na ka BJP ruh ngin sa bud dien ïa ki. Kine ki jingdawa kin hap ban treikam” ong u Bah Hek.
Une u MLA ka Pynthorumkhrah ula kyntait pat ban kynthoh ei ei halor ki jingïakren pynbeit bad ki jingdawa ba shimet jong ki MLA ka UDP.
“Ia kata hi ngam don jingtip. Kane ka dei ka jingïakren bad ki nongïalam ha Delhi. Ngim don jingtip satia” ula ong.
Halor ka jingïakren ba ïadei bad ka jingïasam ïa ka bor bad ka shuki Symbud Myntri Rangbah, u Bah Hek ula ong ba kane ka rai ka shong ha ki nongïalam ba hakhlieh.
“Kane ka shong ha ka rai jong u Myntri Rangbah. Ngi hap ban ïaid kat kum ka jingpynbeit jong u kum u paralok ba ïatreilang” ula ong.