Shillong, Lber 03 : Ka sorkar jylla ka la rai ban pynkhuid kumba 1,50,000 ton ka jaboh jabaiñ kaba lang ha jaka ñiut ha Marten lyngba ka juk stad mynta lane da kata ka bio-mining bad value recovery.
“Ban pynkhuid ïa ki jaboh jabaiñ ba la don slem, ka sorkar jylla lyngba ka tnad Urban Affairs ka la khot ïa ka jingtyrwa ha ka 18tarik Kyllalyngkot na ka bynta ban leh ïa ka bio-mining bad value recovery kaba kot palat 1,50,00 ton (metric tonne) ka jaboh. Kane ka kam ka dang ïaid shakhmat mynta,” ong u Symbud Myntri Rangbah ka jylla ba peit ïa ka tnad Urban Affairs, Bah Sniawbhalang Dhar ha ka jubab (unstarred questions) ba wanrah ha ka Dorbar Mangtyngka kaba dang shu kut shen.
Katkum ka jingong jong u, ka bio-mining kan ïarap ban pynkhuid ïa ki jaboh ba la slem bha lyngba ka value recovery bad kumta kin sa pynthymmai ïa katei ka jaka theh niut.
U pyntip ruh ba ka sorkar jylla ka la shim ïa ka sienjam ban wad jaka na ka bynta ban buh ïa ka jaka pynkhuid ïa kitei ki jaboh bad ruh ka jaka ban bret ïa ki jaboh.
“Ki don katto katne ki jaka kiba la dep jied bad ka jingpynkhreh na ka bynta ka Environment Impact Assesment and Mitigation Plan ka la ïaid shakhmat,” ong u Symbud Myntri Rangbah da kaba kdew ba ïa mynta ka jingïakren bad kito kiba leh ïa ka kam ka dang ïaid lyngba ka tnad Urban Affairs.
Ka jaka theh ñiut ha Marten kadei tang kane kawei ka jaka ba ka nongbah baroh kawei ka leit ban theh lut ïa ki jaboh jabaiñ ïa kaba ka Shillong Municipal Board ka la sdang naduh ki snem 1938.
La ïathuh ruh ba nalor ka jingtreikam jong ka Compost Plan ha Marten kaba ngiam haduh 170 ton ha ka shisngi ka la don ruh ka jingbret ïa ki jaboh ha ka rukom jong ka juk mynta ha ka jaka kaba heh haduh 15000 square meter.
Ka sanitary landfill ka dei ka jaka bret jaboh na ka bynta kito ki jakhlia ba la shah kyntait.
Ïa ka bynta ba trai eh jong katei ka jaka bret niut ka kynthup ruh ïa ka kynja dewbyrtha (geosynthetic clay) kaba 900mm bad shi syrtap ka HDPE Geomembrance kaban ïada ïa ka jingtuid ka um sha rud kaba lah ban pynjaboh pat ïa ka tyllong um.
Nalorkata, u Symbud Myntri Rangbah u la ong ruh ba ka jingpynkhuid ïa ki jaboh na ki jaka sumar (bio medical waster), la pyndait da ka Common Bio Medical Waste Treatment & Disposal Facility (CBMWTDF) bad treikam ha Marten, Shillong ha ka jaka kaba heh 2009.06 square meter.
