Khliehriat, Lber, 03: Ka Regional Democratic Alliance (RDA) kaba long ka kynhun jong ka United Democratic Party (UDP) bad ka Hill State Peoples Democratic Party (HSPDP) kiba dang pynkhreh ïa ka elekshon Lok Sabha, ki la mad ïa ka jakhom khait hadien ba ki nongkitkam bad ki dkhot jong ki ar tylli ki Unit ka UDP ha Sutnga-Saipung Constituency ki la mih noh na party.
U Publicity Secretary jong ka UDP na Sutnga Saipung Constituency Bah Marshall Biam bad u President ka UDP na Unit Hingaria Bah Ting Khonglah, u President UDP na Unit Natbor Bah L.Suchen bad u Secretary UDP Unit Natbor Bah S.P.Suchen bad ar phew ngut ki dkhot ha ka 2 tarik mynta u bnai ki la phah ïa ki shithi iehnohkam jong ki sha u President ka UDP bad phah kopi ruh ïa ki shithi iehnoh sha u MLA barim jong ka Sutnga Saipung Constituency Bah Shitlang Pale.
U Bah Marshal Biam, ha ka shithi iehnohkam, u la pynpaw ba kane ka jingiehnohkam jong u lem bad ki dkhot ka dei kaba ki la ïa rai lang da kawei ka jingmut ba ki kwah ban weng noh ïalade na ka jinglong dkhot hapoh ka UDP na ki daw bym lah ban kiar.
Ki arphew ngut ki dkhot na Natbor bad na Hingaria Unit kiba la weng noh ïa ka jinglong dkhot bad ka UDP ki kynthup u Bah Long Khonglah, Bah Seli Surong, Bah Commingsoon Pohtam, Bah Ïohsuk Rymbai, Bah R.Bareh, Bah Pir Pohshulet, Bah Kiang Pohtam, Bah Stelin Surong, Bah Hep Talang, bah Rit Pohshulet, Bah Phili Rymbai, Bah Three Khonglah, Bah Pynhun Bareh, Bah Lamiki Mulang, Bah Obinash Pohplet, Bah Youluti Pohlong, Bah Tipsngi Surong, Bah Elbrit Khong-muloh, Bah New Pohshna bad u Bah Michal Sohkhlet.
Kine ki dkhot bad ki nongkitkam kiba la iehnohkam bad weng noh na ka jinglong dkhot na ka UDP ki la pynpaw ka dei na ki daw bym lah ban kiar.
