Ka NPP kam dei ka diengpyngkiang ban ïoh jingithuh ka ktien Khasi, la shu kynnoh khlem nongrim : Dy CM

Shillong, Lber 03 : U President ka National People’s Party (NPP), Meghalaya bad Symbud Myntri Rangbah ka jylla u Bah Prestone Tynsong ula ong ba ki jingkynnoh ba dei ka seng NPP bad u Conrad K Sangma kiba long ki diengpyngkiang ne ki nong khanglad ne nongpynwit ban pynrung ïa ka Ktien Khasi ha ka Khyrnit kaba Phra ka long ka bym don nongrim bad ka bym shisha hynrei ka dei tang ka jingthmu ban ïalam bakla ïa ki paidbah ka jylla.
U Bah Prestone ula kynthoh ïa kane ha ka jingïalang jong ka NPP-Pynursla kaba la pynlong ha madan Urksew, PHE ha ka sngi saitjain kaba long kum shi bynta ka jingsdang ïa ka jingïalap election ha katei ka constituency na ka bynta ka kyrtong MP jongka NPP ka Dr Ampareen Lyngdoh.
“Ki jingkynnoh kiba bun jait ki la mih bad saphriang, hana ba khanglad u Conrad Sangma bad ka NPP namar ba ka ktien Garo ka khlem rung ha ka thup kyrteng, hai re hai ito iba kren iba pli i kren kum iba tip tangba im tip ba i kren batip ïa kaba im tip ei ei ruh em ani ka jingkren stad haduh katta katta” ong u Bah Prestone.
“ Ngan shu ïathuh ïa phi ki paidbah , ba ka ba khatduh eh kaba ka Sorkar India ka la pynrung ïa ki ktien ha ka Eight Schedule ne Khyrnit kaba Phra ka dei ha u snem 2003-04 lait nangta ym don shuh” ula bynrap.
U Bah Prestone ula ong ba ki don sa kumba 40 tylli tam ki jait Ktien kiba ka Sorkar India haduh mynta kam pat lah ban rai bad kawei na kita kadei ka Ktien Khasi.
Une u Nongialam ka NPP ula ong bad katba ki briew ki dang tim bad ki dang ïalam bakla, ka seng NPP kan dang kiew arshah namar ka NPP ka ngeit tang ha kawei ka nongrim kata ban shakri ïa ki paidbah ka jylla Meghalaya.
“Paidbah jong ka Pynursla wat shah pynbiej bad nga thikna bha lada dei ba phi shah pynbiej nga la dei ban rem ha kane ka elekshon MLA 2023 pynban phi nang pyndon burom ïa nga da kaba pynjop don burom ïa nga bad ai ba ka Pynursla Constituency kan dang ehrngiew kan dang ehdaw” ula ong
Ka jingkren ito i kong ka la ialam bakla shi katdei eh namar la mih ki jingkynthoh pyrshah kiba har rukom hana ba u Conrad u sniew, u bah Prestone u dei u nongdie ri hynrei ko ki paidbah ka Pynursla wat shah pynbiej ne shah ialam bakla.
U Bah Prestone ula ong ruh “Ngin pynbna mynta ia ka khubor ba ka jingwan nyngkong jong I Kong Ampareen ha Pynursla ngin pynthikna ba in dei ma i i ban long MP jongka Party. To ngin mih na kane ka madan da ka mynsiem kaba shitrhem ban trei shitom ban pynjop don burom ïa I Dr Ampareen”.
Nga i shyrkhei ïa kine ki paralok jongngi kiba pyrta ha surok nga ieit jaidbynriew bad nga isynei ïa ki khun samla jong ngi kiba shah ïalam bakla. Nga kynmaw ba ki don ki para nongïalam kiba pyrta myn shem snem hakhmat Addl. Secretariat kiba ong ko Bahduh Prestone phi la ieit palat ïa ka Constituency to ieit teng ïa ka Jaidbynriew, ïathuh ïa nga mynno nga die tad dor ïa ka jaidbynriew. Tangba ïakren Reservation Policy ka mut la ieit jaidbynriew. Kynmaw lada phim nang ka buh ha ka jingma mano bym kwah ban ïoh kham bun ka reservation wat ha ïing hasem ruh kwah ban ïoh kham bun hi em kumta ka long ruh kumjuh na ka bynta ka jaidbynriew ruh tangba ngi dei ban nang ban khlong ïa ka ksing ngap namar lada ym nang ïoh shah dait ne shah kynthah kylla ha ki ngap. Don ruh kiba ong ba ka jaidbynriew ka don ha tmier nga te nga ong em kam don ha tmier hynrei ka jaidbynriew ka nang kiew irat na kawei ka snem sha kawei pat ka snem. Namar ha u snem 1972 ka mang tyngka ka long tang 5 hajar klur tyngka bad mynta ka long 27 hajar klur tyngka kaba mut ngi la nangkiew bad hapoh ka jingïalam jongka NPP ngin dang ïai kiew nad lada jop lei lei ïa ka MP kan kham kloi ban tuid ka roi ka par sha ka jylla Meghalaya jong ngi na kata ka daw nga kyntu to ngin ïatrei shitom ban ïoh ïa ka jingjop ba don burom”.
Ha kane ka jingïalang la ïoh ruh ïa ka jingkren na ka Kyrtong MP ka NPP ka Kong Ampareen Lyngdoh kaba long ruh ka Myntri Sorkar, Bah Wailadmiki Shylla, Bah Gavin Mylliem bad Kong Grace Mary Kharpuri bad ha katei ka jingïalang la wan ban ïadonlang ki heh nongïalam ka NPP, ki nongïalam ka NPP Pynursla bad ki paid nongkyrshan na ka thaiñ Pynursla.