Da ka said pynliem ka Churchill Brothers ïa ka Lajong
Khluid ka jingïalehkai, shah sei red card mar u wei.
Tilak Maidan, Lber 04: Ka kynhun ïalehkai jong ka Shillong Lajong ka la mad ïa namrem kaba 5 sien mynta ka samoi ha ka lympung I-League 2023-24 hadien ba ka la shah pynliem da 2-1 kol ha Churchill Brothers ha ka jingïakhun kaba la long shabar nala ïing ha madan Tilak Maidan hynne ka Lah Sngi U Blei.
Ka jingïakhun ka long kaba itynnat bad kaba shongshit hapdeng kine ki arliang mamla, ha kaba baroh ar ki la ïakhun tyngeh naduh ba sdang ban ïoh pynkhihjar. Ka la don ruh ka jingïakynad hapdeng ki player kaba la ïalam shaduh u pud ba u referee un sei red card ïa arngut, uwei na ka liang jong ka Churchill Brother bad u wei na ka Lajong.
Ha ka jingïakhun, ka Churchill Brothers ka la ïoh ban lamkhmat nyngkong ïa ka jingïakhun tang hadien 15 minit ba la ïaid ka por lyngba ka kol ba la thep da u Stendly Teotonio Fernandes.
Hadien ba shah lamkhmat da shi kol, ka Lajong ka la pyrshang katlah katïai ban ïoh pynphai ha kaba ka la ïoh ïa shibun ki kabu kiba la sepei tad haduh ynda la jam sha ka 42 minit ba u Phranki Buam u la ai mynsiem ïa ka kynhun da kaba pynïakhaid shuwa ban kut ka kylla step.
Ka jingïakhun ka la nang khluid ha ka kylla kaba ar, bad kumba katto katne por arngut ki player, u Ronaldkydon Lyngdoh Nonglait jong ka Shillong Lajong bad u Lamgoulen Hangshing jong ka Churchill Brothers ki la shah sei red card ha ka minit ba 68, kaba la pynlong ïa kine ki ar kynhun ban duna sha ka 10 ngut.
Ha ka 80 minit u Martin Chaves u la ïoh ban thep ïa ka namtam na bynta ka Churchill Brothers kaba la pynthikna ïa ka kynhun ban khur pura ïa ki lai point na kane ka jingïakhun.
Da kane ka namjop ka Churchill Brothers ka la ïoh ban kyntiew 20 point ïalade ha ka miej na ki 17 sien ïakhun bad ka shong ha ka kyrdan ba 9, katba na ka Lajong ka dang ïaineh ha ka kyrdan ba hynriew da 26 point naki 17 sien ïakhun, ka duna da shi point ban knieh kyrdan ba san na ka Inter Kashi.
Ka Shillong Lajong FC kan ïakhun biang la 9 tarik mynta u Lber pyrshah ïa ka Aizawl FC shabar nala ïing ha ka por 4:30 baje nohphaisngi.