Kyntait ka KTFA ba donkti wanrah shongsyier ha ka thaiñ Marmaiñ

Shillong, Lber 03 : Ka Seng Karbi (Mikir) Traditional Faith (Religion) Association (KTFA) ka la pynshai ba hadien ba ki la ïoh sngew ïa ka jingrah jong u MLA ka Nongpoh ha Iing Dorbar haba ïadei bad ka jingshong syier ki paidbah ha ka thaiñ Marmaiñ ki kwah ban pynshai ba kim don bynta ei ei halor katei ka kam.
Katkum ka kyrwoh ba la phah da u President bad Secretary ka Seng la ong hadien ba ki la ïohsngew na ki Social Media ki la pyrshang ban wad jingtip hapoh ka shnong bad ha ki jaka ba marjan, kim shym la lap sabut ei ei ruh em ba ka don kum kata ka jingtah poster hapoh shnong ne hangno hangno ruh.
“Kumta ngi sngewdei ban pynshai ba katei ka khubor ka long ban ïalam bakla, bad ngi kyrpad shaphi ki nongshong shnong jong baroh kawei ka jylla ban nym sngewthuh bakla,” ong ka kyrwoh.
Haba pynshai pat halor ka voice mail ki nongïalam ka Seng ki la kam ba na ka liang ka KTFA ki la payrshang ban wad jingtip bad kim shym la ïoh kano kano ka sabut ba don kum kita kiba kren ha ka voice mail.
“Haba ïadei bad ka jingkynnnoh ba la shim rai ban phah weng ïa ki stashu na ki iingskul kam long kaba shisha bad ym shym la don satia kaba kum kata ka rai. Hynrei ha ka jingïalang ha katei ka sngi ka long tang ka jingïasyllok haba shit ba shai ha khmat ki paidbah paidlang baroh kumno ban pynneh pynsah ïa ka jingngeit Niam Tynrai sha kine ki thaiñ,” bynrap biang ka kyrwoh.
Nalorkata haba pynshai haba ïadei bad ka jingkynnoh ba don ka jingïadei bad ka seng Sanmilato Samatan Samaj na Assam, katei ka kynhun ka la ong ba ki kwah ban pynshai ba kim don jingtip ne jingïadei ei ei ruh em shaphang kane ka Seng hynrei ki dang shu ïoh sngew na ka Voice Mail.
Shuh shuh la ong halor ka Traditional symbol, kum ka seng kim don kano kano ka jingtuklar ne hukum ban weng, hynrei ki shaniah ha ka bor jong u Syiem Hima Dumura (Doomora), kum u Syiem u Kmie ban pynbeit ïa kane ka kam.
Kumta, halor kane, ka Seng KTFA ka ong ba ki kyntu ïa ki bor pynïaid distrik ba lada don kum kita kiba pyndik, ki bor distrik ki dei ban leh ïa kaba donkam bad kum ka seng ki kular ban ai ka jingïatrei lang bad ki bor pynïaid distrik ban ym ailad ïa kum kita kiba wan pynkulmar ha shnong ha thaw.