Ka synshar khadar ka dei kaba la saiñdur da u Blei ba kan long kaba khuid basuba: Ardent Basaiawmoit

Khliehriat, Nailur, 3: Ka party Voice of the People (VPP) myn ha ka sngi saitjaiñ, ka la pynlong ïa ka jingïalang paidbah ha shnong Umkiang, East Jaiñtia Hills District, kiba bun ki paidbah, kiba napoh ka district ki la ïa poi sha kane ka jingïalang bad ka la don ruh ka jingpynrung dkhot sha ka party.
U President rangbah jong ka VPP, uba Ardent M. Basaiawmoit, haba kren ha ka jingïalang u la kren shaphang ka synshar ka khadar kaba khuid ba suba bad ong ruh ba ka synshar ka khadar ka dei kaba la saiñdur da u Blei bad u Blei ruh u kwah ba ka synshar ka khadar kan long kaba khuid ba suba kuba la thoh ruh ha ka ktien ka jong u Blei na ka kitab Deuteronomy na ka kitab Exodus.“Ka jaitbynriew ka don hapdeng ka tieng ka smiej, ka daw ka dei namar ba ngim don ka synshar ka khadar kaba beit ka biang, kaba khuid kaba suba, ka jylla jong ngi ka dei ka jylla kaba u Blei u la kyrkhu kyrpang, naduh ka jingdon ka mariang, ki krem ki kroh, ka jingdon ki mar poh khyndew, kum ka jaitbyn-riew, ngim dei ban long kiba kyrduh ha ka jingim, hynrei kumno mynta ka long, kiba duk ki la nang duk, katba kiba riewspah pat ki la nang riewspah”
U la ong ruh ba “ka lynti kaban ïalam ïa ngi sha ka lawei kaba phyrnai, ka lawei kaba shai ka dei beit da ka synshar ka khadar kaba khuid ba suba, ko ki paidbah nga kwah ban ong ba ka politik kaba jakhlia, ka dei ka ktien kaba shu pynthame ïa ki paidbah, ka ban nym ailad ba u paidbah un sngewthuh ba ka synshar ka khadar ka dei kaba donkam tam, ba u paidbah u dei ban leh sting ha kaba ïadei bad ka kam ban jied nongmihkhmat, hynrei kynmaw ba ai ba ngi ngin tip bad sngewthuh ba ka politik lane kata ka synshar ka khadar ka dei ka saiñdur ka jong u Blei ba kan don ka synshar ka khadar, hato lah mo ban nym don Dorbar Shnong, lah mo ban nym don Rangbah Shnong bad kita ki nong ïa bah ïa ka shnong ka thaw? shano kan poi ka shnong lada ngim don ka Dorbar shnong, kane ka dei kata ka saiñdur kaba u Blei u la buh, bad haba u Blei u la saiñdur u kwah ruh ba kan long kaba khuid kaba suba kaba don ka jingkitkhlieh”
Ban pynskhem ïa kaei kaba u kren bad pashat sha ki paidbah ha Umkiang, utei u nongïalam rangbah ka VPP, u la pynshong nongrim na ka ktien ka jong u Blei ha kaba kumno u Moses u maham ïa ki nongsynshar kiba synshar ïa ki khun Israel, kam dei dei ba u Moses u leh da la ka jong ka jingstad briew ka jong u, hynrei u Moses u sngap ïa kaei kaba u Blei u bthah ïa u, u Blei u maham ïa ki nongsynshar jong ki khun Israel lyngba u Moses kaba ngin shem na ka ktab deuteronomy, kitab Exodus bad ngin lap hangto ba u Moses u maham ïa ki nongsynshar ki khun Isreal bad ong ‘Me wat pynkynriang ïa ka jingbishar, me wat ñiew shiliang khmat, me wat bamsap, ka jingbamsmsap ka pynmatlah noh ïa ki khmat jong kiba stad bad ïa ka hok hi men shakri kata ka dei kaba u Blei u kwah ïa ki nongsynshar ba kin long ha kane ka pyrthei, kata ka dei ka jingshisha kaba khraw”
Ha kajuh ka por, u bah Ardent u la kyntu ïa ki paidbah nongkyrshan ba kim dei ban leit pan pisa hi ha ka por election bad lada ki nongmihkhmat ki ai dei ban shim beit bad ong khublei shibun, hynrei ban pan te em bad ka vote pat dei beit sha u Prah “balei phin pyn jemdaw ialade phin shah thied 500 1000 tyngka lada thied 1 lak ruh kynmaw pynshong nongrim kan shong tang katno tyngka donkam ban sngewthuh” u la bynrap. U la ong ruh ba mynta ki paidbah ki la sngewthuh ba ki donkam ïa ki nongïalam bad ïa ka party kaba shngaiñ.
Kiba la ai jingkreh ha katei ka sngi, ki kynthup ruh u nongialam ka VPP na ri lum Jaiñtia, u bah Damewanhi Rymbai, ka kong Deiwi Tongper, kaba dei ka dkhot (Convener VPP Narpuh Circle) kaba la khot pynlong ïa kane ka jingïalang ka VPP, la ioh ruh ïa ki jingshad na ki heprit kiba shad pynbyrngia ïa ki paidbah.
Ha katei ka sngi ka la don ruh ka jingpyn rung dkhot ïa kito ki ba kwah ban long ki dkhot ka VPP bad bun kiba la leit ban pyniasoh bad ka party VPP.