Ka step jong ka jinglynñiar …bad ka jingtuid ka snam kiba lui lui ha Mukroh

Jowai/ Shillong: Ka sur lynñiar, ka sur ïam bad ka snam kaba lyngkien ryngkat ki met ïap kiba thiah lyngktop ha madan, ki la wan phai biang sha ki para ri hadien khatar snem, haba ki ktang suloi na ki bor jong ka sorkar Assam, ki la synreit naphang ïa ki paidbah ha Mukroh, West Jaiñtia Hills District.
Ha ka step jong ka 22 tarik u Naiwieng 2022, ki Pulit Forest Guard, klem da ai kano kano ka jingsiat pynma ïa ki paidbah kiba la ïa mih sha surok naduh ka por ba dang dum, ki la siat pathar da ki phew kuli da ki automatic sha ki paidbah bad tang shiphang hadien ka jingïaphet kulmar ki paidbah, la ïohi ïa ki artylli ki met ïap jong ki rangbah kiba kieng la ka pla kiba thiah lynktop ha surok hapdeng ka jinglyngkien ka snam. Nangta harud jong ka surok pat don arngut ki shynrang kiba thiah mar syndah. Shapoh jong ka surok, kaba don ka kynroh kaba jrong ha ka jaka ba kham long sañium, don sa arngut kiwei pat kiba la shu thiah lyngktop hajuh.
Kiba la kyllon ïap ha kane ka jingthombor ki long u Bah Thal Shadap, 48 snem ka rta, nangta u Bah Shirup Sumer 45 snem, u Bah Sip Talang, 54 snem, u Bah Tal Nartiang bad u Bah Si Dhar
Kane ka jingjia ka pynkynmaw ïa ka jinglyngkien ka snam ha Langpih ha ka snem 2010, haba saw ngut ki rangbah ki la kyllon ïap ha ki kuli ba shyrkhei jong ki Pulit Assam.
Kane ka jingshah siat ïap kine ki para ri ha Mukroh, ka la jia ha ka por ba ka Meghalaya bad ka Assam ka ki dang don ha ka lynti ban sdang ïa ka jingïakren pynbeit pud ha ka bynta kaba ar. U Myntri Rangbah, u Conrad Sangma haba kren halor kane ka jingjia ha Mukroh, u la ong, “Ka jingïakren pynbeit pud bad ka Assam kan nym long shuh kumba ju long”.
Katkum ka jingïathuh ki paidbah nongshongshnong ka Mukroh, la ong ba ha ka por ba bun ki dang ïoh thiah, ki la ïoh sngew ïa ka jingpyrta u Rangbah Shnong ban ïa mih paidbah namar ba ka don ka jingshah kem jong ki 6 ngut ki nongshongshnong ha ki bor Pulit jong ka Assam. Kumta ki paidbah ki la ïa mih sha surok ban pynpaw pyrshah ïa kane ka jingleh ki bor ka Assam. Hynrei ha ka por 7 baje ei ei mynstep ka la don ka jingïatur paidbah ha kaba ki don kiba la rah bad ki dieng, ki maw bad hapdeng une u paidbah ruh la don ki Pulit bad ki Forest Guard jong ka Assam bad ka la don ruh ka jingïakhynñiat hapdeng ki paidbah bad ki Pulit Assam.
Ki Video kiba la saphriang paidbah ki paw ba ha kaba kum kane ka por, la shu ïoh sngew ba ka don ka jingsawa ki suloi kiba sted bad bun kuli bha kaba long kum ka jingsiat da ki suloi automatic. La ïohi ba ki paidbah ki la ïamareh bad phet kulmar kynthup ruh ïa ki kynthei. Dei ynda la kynjah ki paidbah ba sa ïohi ïa kine kiba la thiah ïap ha surok bad sharud surok. Hadien katto katne por pat la ïoh sngew ïa ka jingïam jinglynñiar jong ki kynthei briew bad ka jingïam pangnud ki kmie ki kpa, ki khun ki kti bad kiba haïing hasem jong kine kiba la khlad.
La ïathuh ruh ba nalor kine ki san ngut ki Khasi Pnar, la don uwei u Forest Guard jong ka Assam, uba la kyllon ïap ha ka jingshah siat kulmar ki Pulit jong ka Assam.
Mar syntip ïa kane ka jingjia ki nongïalam Sengbhalang bapher bapher ki la hiar kyrieh sha Mukroh ban leit kyrshan bad ai mynsiem lem ïa ki para ri sha katei ka jaka bad ban ïarap lem ïa ki ha kino kino ki jingdonkam jong ki.