Da ka NIA ne CBI yn dawa tohkit ka Meghalaya bad Assam

Shillong, Naiwieng 22: Ka jingïalang ba kyrkieh ka Kynhun Myntri kaba la long ha ka janmiet sngi Ba-ar ban ïakren halor ka jingshah siat ïap ki san ngut ki Khasi-Pnar, ka jingïalang ka Kynhun Myntri da kawei ka sur la rai ban dawa ba ka kynhun tohkit ka sorkar pdeng la ka dei da ka National Investigation Agency (NIA) ne ka Central Bureau of Investigation(CBI) ka dei ban shimti ban tohkit halor kane ka jingshah siat ïap ha ki pulit Assam.
Na ka liang ka kynhun myntri ka sorkar jylla ruh kan sa leit ban hiar mynta ka sngi ban jurip ïa kane ka shnong kaba jia kane ka jingshah siat ïap ki Khasi-Pnar ha ki Pulit Assam.
Haba kren sha ki lad pathai khubor hadien ba la dep shong jingïalang u Myntri Rangbah ka jylla u Conrad K Sangma u la ïathuh ba u Myntri ki Kam poh ïing ka sorkar jylla u Bah Lahkmen Rymbui u la hiar da lade sha kane ka jaka ban ïakynduh bad kiba ha ïing bad ban pynkhreh ïa ka kaiphot na ka jaka ba jia kane ka jingshah siat ïap.
U la ïathuh ba na ka liang ka kynhun myntri ka la rai ban dawa ba ka kynhun tohkit jong ka sorkar pdeng la ka dei da ka CBI ne NIA ka dei ban shimti tohkit ban lap ïa ki jingshisha baroh.
U la ong ba na ka liang ka Kynhun Myntri kan sa leit sha Delhi ha ka sngi Palei ban leit ban ïakynduh ïa u Myntri Kam poh ïing ka sorkar pdeng u Amit Shah ban leit ai kaiphod kaba na ka liang ka sorkar jylla ka la pynkhreh halor kane ka jingjia ban kumjuh ban pynsngew ba ka sorkar jylla ka kwah ba ka CBI ne NIA kan shimti tohkit halor kane.
U la ong ruh ba ka Kynhun Myntri ha ka jingleit sha Delhi kan sa leit ban ïakynduh ïa ka National Human Rights Commission (NHRC) ban aiti ïa ka kaiphod halor ka jingshah siat ïap ki san ngut.
U la ïathuh ruh ba na ka liang ka Kynhun Myntri ka la rai ban thung da ka Special Investigation Team(SIT) kaba u DIG ka Eastern Range un sa khlieh ïa kane ka jingtohkit katkum ka ka ejahar kaba la ujor halor kane ka jingshah siat ïap.
Shuh shuh u la ïathuh ba na ka liang ka Kynhun Myntri ka la rai ban thung da ka Kynhun Tohkit ban khlieh da u Nongbishar ne ka Judicial Commission lada dei u nongbishar ba la shong thait ne uba dang don ha ka kam ba kan peit bniah ïa ki daw kiba wanrah haduh ka jingduh ei ki mynsiem briew.
Haba la kylli la kane ka kynhun tohkit kan dei lang kaba thung da ki ar sorkar jylla, u Myntri Rangbah u la jubab, “Ngin sa syllok bad ka Assam la kan dei kaba kynthup lang ne tang na ka liang jong ngi ha kane ka kynhun tohkit”.
U Myntri Rangbah u la ïathuh ruh ba mynta ka sngi na ka liang kynhun myntri kan sa leit ban iuhkjat sha Mukroh mynta ka sngi ha kaba ma u ryngkat u Symbud Myntri Rangbah u Bah Prestone Tynsong, u Myntri ka tnat PHE u Bah Renikton L Tongkhar, u Myntri ka tnat Disaster Management u Bah Kyrmen Shylla ban leit aiti ïa ka bai lut ksan sha ki ba haïing jong kito kiba la shah siat ïap kaba kot san lak tyngka.
Shuh shuh u la ïathuh ba na ka liang jong u u la ïakren lyngba ka phone bad u Myntri Rangbah ka Asaam u Himanta Biswa Sarma ban batai ïa ki jingjia baroh bad dawa ba na ka liang ka sorkar Assam kan shim ki lad ban pynshitom ïa ki pulit bad ka Forest Guard kiba donkti siat ïap ïa ki san ngut.
U la ïathuh ba ka sorkar Assam ka la pyntip ba na ka liang jong ka ka la transfer noh ïa u SP ka West Karbi Anglong bad ka la sospon ïa u OC ka Jirikirding Police Station bad ruh ïa u Forest Range Protection Officer ba peit ïa ka ktem ha jan katei ka jaka ba jia ka jingshah siat ïap.
U la bynrap ruh ba ka sorkar Assam ka la rai ban ai ka jingïatreilang bad kino kino ki sienjam kiba ka sorkar Meghalaya la ba kan leit pynsngew sha ka sorkar pdeng halor ka jingthung kynhun tohkit ne kiwei pat ki mat jingdawa.
Shuh shuh u la ïathuh ba ka sorkar ka la rai ban pynsahngeh noh shisyndon ïa baroh ki tamasa kiba ka thmu ban pynlong kum shi bynta ban ïasnoh mynsiem bad kiba haïing ba mad ïa kane ka jingjia.
“Ki tamasa baroh ngin pynsahngeh noh syndon bad ki prokram sorkar baroh la ka dei ban plie mawnongrim ne kino kino ki projek ngi la rai ban sahngeh shipor tad haduh ka 30 tarik mynta u bnai” u la ong.
Kumjuh ruh na ka liang ka sorkar Assam ka la rai ban thung da ka Judicial Inquiry Commission ban khlieh da u Nongbishar ba la shongthait ka Guwahati High Court bad kumjuh ka la rai ba kan siew bai lutksan kaba kot san lak sha kiba haïing kito kiba shah siat ïap.
Shuh shuh na ka liang ka Assam ka la pynpaw ïa ka juh ka jingmut bad ka sorkar jylla ba ka NIA ne CBI ka dei ban shimti ban tohkit halor kane ka jingjia.