Jowai, Naiwieng 22: Hynne dangstep phyrngap ha ka por kumba 1:30 shiteng ei ei, katba ki trai shnong na Mukroh ki dang wan kit ïa u Kba na ki Hali jong ki, kila kit artad katto katne ki lyngkhot dieng sawdong da kawei ka trok (Fourwheel) kiba ki pom na ki jaka lajong kiba hap hapoh u pud u sam jong ka jylla Meghalaya.
Haba kine ki nongkit kba kila poi sha surok bah katto katne ki Pulit jong ka Assam ha ryngkat ki Forest Guard kila beh thong ia ki, na ka bynta ban ïoh dawa pisa. Kane ka jingbehthong jong ki Pulit Assam kila rung haduh 6 Kms shapoh u pud ka jylla bad poi shaduh shnong Mukroh.
Ban pynsangeh ïa kine ki kali, ki Pulit Assam kila siat ïa ki shakha jong katei ka trok Fourwheel na shakhmat bad shadien bad pynpait ïa kawei ka kali Maruti Car kaba kit kba. Hadien kata ki Pulit Assam kila kem noh ïa ki lai ngut ki briew na katei ka trok bad leit rah ia ki sha Jrikyndeng Police Station jong ka Karbi Anglong.
Hadien ka jingioh jingtip jong ki nongshong shnong ka Mukroh ïa ka jingshahkem jong kitei ki laingut, kumta kila ïamih paidbah da ka jingthmu ban leit pyllait ïa kitei kiba la shah rahbor ha ki Pulit Assam. Hynrei ha lynti ha ka por kumba 7:00 ei ei ha rud nong Mukroh hi ki Pulit Assam kila ap lypa ban khang lad ïa ka jingleit tur jong ki paidbah ban leit pyllait ïa kitei ki briew kiba la shah rah sha Assam.
Kumta kala mih ka jingïania ktien kaba jur hapdeng ki paidbah nongshong shnong bad ki Pulit Assam. Ki Pulit Assam pat ha ka jaka ba kin sngap ïa ka jingdawa jong ki paidbah kila siat naphang sha ki paidbah da ki Pistol Pistol 9mm haduh 12 round, ki 303 Riffle 18 round, ki 7.62- 21 round bad ki suloi 5.66 – 4 round.
Ha kane ka jingsiat ki Pulit Assam ka la wanrah ka jingiap jong ki 5 ngut ki nongshong shnong ka Mukroh bad uwei u Forest Guard jong ka Karbi Anglong hi. Nalor kine sa ar ngut ki nongshong shnong ka Mukroh kiba la don hapdeng ka jingmynsaw jur ki dang don mynta ha Ialong Civil Hospital.
Mar mar hadien kane briew ki Pulit Assam kila phet noh shapoh Karbi Anglong, bad ha ka jingpynher stet kawei ka kali Pulit Assam kala hap noh sha nala. Na ka liang jong ki Forest Guard jong ka Karbi Anglong Assam ban khanglad ïa ka jingwan tur ki paidbah da ki kali, kila pynkhyllem da ki dieng ban ha shilynter ka ka surokbah.
Ha kaba ïadei bad kitei kiba la shah kem na ka liang jong ki bor District ka West Jaiñtia Hills kata u DC bah B.S. Sohliya, u S.P u B.D. Marak, u ma M.A. Callam ryngkat ki Pulit kila la hiar shaduh Mukoilum Police Out Post, West Karbi Anglong na ka bynta ban leit pyllait ïa kitei ki lai ngut kiba la shah rahbor.
