Shillong, Naiwieng 22: U Bah Ardent Miller Basaïawmoit, President ka VPP, u la ong ba ka jingjia ha Mukroh, kadei ka jingsiat khnang ka Assam ban pyntieng pynsmiej ïa ki paidbah Khasi ba shong ha khappud, khnang ba kin phet shnong bad ba kan ïoh kurup ïa ki jaka jong ki.
Haba pynpaw ka jingsngewkhia kaba jur halor ka jingshah siat ïap ki San ngut ki para ri ha katei ka Shnong kaba hap ha West Jaiñtia Hills District kaba don marjan bad ka Shnong Borato, u Bah Ardent u la ong ba kane ka jingshim kabu jong ka Assam kadei namar ba ka ïohi ïa ka jingshah jem bad ka jingshah jong ka Meghalaya na ka por sha ka por bad ong ruh ba u la ju kren wat ha Assembly ruh ba lada ka sorkar kam lah ban ïada ïa ki paidbah ha khappud, dei ban ai noh da ki tiar ïaleh ba kin ïada ïalade.
U la ong ruh ba ka jingpynbeit pud kam mut pat ba lada ym lah ban pynbeit yn shu siat beit katba mon ha ki briew jong ngi. “Kane kadei ka buit sianti jong ka Assam ban ïoh kurup ïa ki jaka jong ngi”, u la ong.
Shuh shuh u la ong ruh ba kaba sngewsih pat ka long ba ki nongïalam ka jylla pat kim sngewthuh ïa kane ka jingleh ka Assam, hynrei ki shu ieh beit kumto ïa ki briew la jong namar ba kim don jingieit ne sngewsynei na ka bynta jong ki. “I kumba ki ong pynban ieh ka mat siat ïap ka Assam”.
Ha kaba ïadei bad ka jingdawa kiba bun ban pynsangeh noh ïa ki Festival kum ka Cherry Blossom Festival ka Film Festival, ïa kaba ka sorkar ka la pynsangeh noh hadien kine ki jingdawa, u Bah Ardent u la ong ba ma u hi shimet um sngew ïahap ban don kine ki Tamasa, namar kim wanrah kano kano ka jingmyntoi, hynrei kidei tang ki jingpynkmen ka sorkar ïa ki samla ban tap eitmiaw ïa ki jingbymlah treikam jong ka. “Kumno yn leh kmen ne leh tamama hapdeng ka jingduk jingkyrduh bad hapdeng ka jinghiar ka ïoh ka kot”, u la ong, da kaba ong ba ym dei ban pynlong kum kine ki Tamasa, bad ha kaba kum kane ka por haba jia kum kane ka jingjia, ka sorkar ka ladei ban sngewthuh hi, ym da donkam ban ap ban don ban dawa pynsangeh.