Shillong, Naiwieng 22: Ka Seng KSU Central Executive Committee, ka la pynpaw ka jingsngewkhia bad pyrshah jur ïa ka jingdkhat jubor ka Assam ïa ki San ngut ki mynsiem ba lui lui ha Mukroh mynta ka sngi.
Ka Seng ha ka CEC kaba la long kyrkieh mynta ka sngi, ka la rai ban pynlong da ki jingïakhih kiba jur da kaba sdang shuwa daka jingwah lama ïong ha ka sngi Balang, kata ha ka 23 tarik mynta u bnai.
Ka kyrwoh ba la phah da u Bah Donald V. Thabah, General Secretary, la ong ba ka ong ba ka CEC jong ka Seng ka la shong kyrkieh mynta ka sngi ban ïasyllok bad pynbeit halor kum kine ki jingjia kiba ju jia khah khah ïa ki para Khasi ha ki thaiñ khappud.
Ka Seng ka la ïa kren sani bha halor ki jingshah thombor ki Khasi kiba sah ha khappud naduh mynshwa khamtam ki jingjia kiba jia ha Sahsniang ha u snem 2003 ha kaba 4000 ngut ki Khasi ki hap phet wir na Block 1 namar ka jingshah pyndik ha ki pulit Assam bad lehnoh Karbi, ka jingshah siat pathar ki Khasi ha ïew Langpih, West Khasi Hills ha u snem 2010 ha kaba 4 ngut ki rangbah Khasi ki la kyllon iap, ka jingshah pyniap u Bah Tyngshaiñ Mukhim ha ki Nepali ha khappud Ri Bhoi ha Raid Nongrung ha u snem 2018, bad kane kaba la jia mynta ka sngi ha Mukroh.
Ha kane ka jingïatai, ka Seng ka la lap ba ka daw jong ki jingshah thombor ka dei namar ka jingbymlah ka sorkar Meghalaya ban ai jingïada ba pura ïa ki nongshong shnong ha khappud kaba la pynshlur ïa ki bor sorkar Assam, Karbi Anglong Autonomous Council, lehnoh Karbi bad poiei Nepali ban thom naphang bad ïuhroit donbor ïa ka hok longbriew man briew ki Khasi ha khappud. Kum ban shu ai nuksa, ka sorkar Mizoram ha u snem 2021 ka la lah ban ai jingïada kaba paka ïa ki nongshong shnong jong ka kiba sah ha khappud Mizoram-Assam na ka jingwan thombor ki pulit Assam bad ki kharbang da kaba phah bad pynbiang ïa ki pyrton Pulit ha ryngkat ka jingsynran ki politician bad ki riewpawkhmat.
Ka jingbymlah pynbeit pud naduh mynshwa haduh mynta ka la wanrah ïa ka jingïam kthang ïa ka Jaidbynriew Khasi naduh ba ïoh ïa ka jylla Meghalaya haduh mynta ha kaba la sakhi ba ka jingleh donbor ka dei beit na ka Assam bad ka sorkar Meghalaya ka shu shah kum u diengshaiñdoh.
Hadien kane ka jingïatai, ka Seng ka la rai ba ka jingïapynbeit pud dei ban pynïaid noh ha ka jingkhmih bad jingpynbeit lang ka sorkar pdeng.
Ka la ong ruh ba ka jingdawa Hill State ka dei namar ba ki Khasi ki kwah ban synshar hi dalade ïa lade, kumta baroh ki shnong Khasi bad ki jaka ba hap hapoh ki Hima, Raid, Elaka Khasi ki dei ban hap beit hapoh Meghalaya lym kumta ka mut ka jingthmu jong ka Hill State ka la pulom.
La dawa ruh ba dei ban weng noh mardor ïa ki len pulit Assam ne kino kino ki tnad sorkar Assam na ki shnong Khasi ha khappud.
Ka Seng ka la dawa ruh ba dei ban kem ban pynshitom ïa ki runar na Assam kiba don kti ban synreit kuli pathar ia ki paidbah ha Mukroh.
Ka sorkar Meghalaya ka dei ban ai jingïarap ia ki longïing jong kito kiba la khlad bad mynsaw ha katei ka jingjia.
Ka sorkar Meghalaya ka dei ban seng ïa ki Police Stations ha man la ki jaka khappud khamtam ha ki jaka ba kham don jingiakynad.
Ka Police Outpost ha Bararo/Mukroh ka dei ka jingdawa jong ka KSU bad ki paidbah naduh mynshwa, ka sorkar ka dei ban pynurlong noh mardor.
Ïa mynta ka sorkar Meghalaya ka dei ban phah ïa ki pulit jong ka ban ïada ïa ki paidbah sha Mukroh bad ban pynher krad noh mardor ia ki pulit Assam.
Shuh shuh na ka liang ka KSU ka la dep phah ïa ki nongialam ka CEC kiba kynthup ïa u Samla Biangbor L Paliar, Vice President, u Samla Sonstar Nongkhlaw, Samla Barikular Nongsiej, Samla Ïashan Mukhim, Samla Shiningstar Kharbihkhiew bad kiwei kiwei ki dkhot kiba na West Jaintia Hills bad East Jaintia Hills ban don ryngkat lem bad ki nongshong shnong ka Mukroh.
Kyntang ïa wai ka KSU ka phah ia ka kyrwoh sngewlem sha ki bahaïing jong ki 5 ngut ki paradoh parasnam kiba la khlad ha katei ka jingjia bad sha baroh ki nongshong shnong ka Mukroh.
