Shillong, Naiwieng 22 : U MP jongka jylla sha ka ïing dorbar thawaiñ Lok Sabha uba long ruh u President ka MPCC u ma Vincent H Pala u la ong ba u Myntri kam pohïing ka jylla ( Home Minister) u ma Lahkmen Rymbui u dei ban shim ka jingkitkhlieh halor kane ka jingshah siat iap ki san ngut ki mynsiem briew bad wanrah ka jingmynsaw jur ïa kiba bun na ka jingthombor ki pulit Assam ha khappud Mukroh da kaba u dei ban hiar shuki mardor kum u myntri kam pohïing.
U ma Pala u phah ïa ka khubor sngewlem sha ki long ïing jong kito kiba shah siat iap ha ki pulit jongka Assam bad duwai ruh ba kito kiba mynsaw jur kin ïoh ïa ka jingkoit kaba kham kloi.
U la dawa ba dei ban siew bai lutksan da kaba heh sha ki long ïing jong kiba la duh ei ïa ka jingim bad kumjuh ruh sha kito kiba mynsaw. Nalor ka bai lutksan ka sorkar ka dei ban siew ruh ïa ki bai dawai bad baroh ki jinglut jingsep ha kaba ai jingsumar ïa ki.
U la ong ba kane ka jia namar ba ka sorkar MDA ka khlem shim khia ban peit ïa ki paid khappud namar na ka por sha ka por ka jingshah thom bor ka jia bad ki paidbah ki long kum ki langknia ha ki pulit Assam. Kumta u dawa ba ki ar sorkar kata ka Meghalaya bad Assam ki dei ban shim khia halor kane ka jingjia khnang ba kum kane ka jingjia kan ym jia shuh hadien habud.
