Shillong, Naiwieng 22:U Nongïalam ka Liang Pyrshah u Dr Mukul Sangma u la ong ba ka jingsiat ki pulit Assam ha Mukroh kaba wanlam pat sha ka jingduhei 6 ngut ki mynsiem ka dei ka jingthmu ban pynïap naphang ïa ki paidbah.
“Ka jingjia ha Mukroh ka dei hapoh u pud u sam ka jylla Meghalaya bad na kaei kaba nga ïoh jingtip ka long ba kane ka jingsiat ki pulit Assam ka dei namar ki kwah ban siat ïap naphang ïa ki paidbah’ ong u Dr Mukul.
“Ka jingduh ki mynsiem ba kordor ha kane ka jingjia ka dei namar kino kino ki daw hynrei kaei kaba shai kaba phalang na kane ka jingjia ka long ba ba kim don shuh ka jingpyrkhat briew ban pyrkhat lem ïa ka jingim, ka jingmynsaw bad ka hok kum ki briew ban im,” u la ong.
U Dr Mukul u la takraiñ tyngeh ruh ïa ka sorkar Assam bad Meghalaya kaba ym shym tip eiei ïa kaei kaba jia.
“Kaei kaba la jia mynta ka sngi bad ha kine ki khyndiat por ba la dep, nga lah ban ong ba ba ki sorkar na ki ar jylla kim don jingtip na kaei kaba jia shisha bad kim sngewthuh ruh ïa ki SOP ba la mynjur ban pynneh ïa ka shongsuk shong saiñ ha ki jaka khappud’ u la bynrap.
Ha ka sngi Ba-ar u Dr Mukul u la hiar jurip ruh ïa sha ka shnong Mukroh ban kynduh bad ki paidbah katei ka shnong bad khamtam bad kiba ha iing ha sem kiba shah siat ïap ban ai mynsiem bad ai ka khubor sngewlem sha ki bad ba kin ym duh mynsiem namar ka TMC bad ka kynhun ka ieng ha syndah jong ki.
Ha ka jingleit jngoh ïa kiba mynsaw kiba shah sumar ha Jowai Civil hospital u la ai ka jingkular ba un ïakhun haduh ba in da ïoh ïa ka hok jong ki.
