Ka sorkar kan leh da kaba tyngeh katkum ka aiñ ong u Myntri Rangbah ka jylla

Shillong, Nailar 24 : Haba shim ïa ki jingjia ha ka 19 tarik Nailar kum ka jingjia kaba sngewsih shibun bad kum ka kam thom bor, u Myntri Rangbah ka jylla u Conrad K Sangma ha ka Lah Sngi U Blei ula kren shai ba ka Sorkar kan leh da kaba tyngeh pyrshah ïa kito kiba pynkulmar shnong bad pyrshang ban pynrung ïa ka jingtieng jingsmiej hapdeng ki paid nongshong shnong.
“Kaei kaei kaba jia ka long kaba sngewsih. Ki don ki briew kiba pyrshang ban pynrung ïa ka jingtieng jingsmiej ha ka imlang sahlang bad ngin ym map satia ïa ki. Ngin sa leh da kaba tyngeh ïa kito kiba pyrshang ban pyntieng ïa u paidbah kat kum ki lynti jongka aiñ. Ki nongshong shnong jongngi kim dei ban khuslai” ong u Myntri Rangbah
U Myntri Rangbah ula kubur ba ki paidbah ki la mad ïa ki jingeh hadien katei ka jingjia namar ka jingpynphai kylliang na ka Jylla ba marjan.
“Ki paidbah ki la mad ïa katto katne ki jingeh, ngi mynjur ïa kane namar ka jingleh markylliang kaba ngi ïoh na ka Jylla ba marjan ka Assam. ïa kane hap ban tehlakam da ka jingïakren bad jingïapynbeit. Mynta ba ngi la dep leh ïa kine kiei kiei baroh, ngi dei ban jam ha ka lynti kaba tei” ula ong.
Haba khot ïa ka jingshim lang ïa ka jingkit khlieh, u Conrad ula ong ba ka hok ban ïakhih da kaba jai jai kam dei ïa kaban pyndon kam bakla ha ka ban shim ïa ka aiñ hala ka jong ka kti.
“Ym tang ka Sorkar hynrei ngi baroh, kynthup ki Seng bapher bapher, ki dei ban ïoh jinghikai bad pynthikna ba kin shim ïa ki sienjam ba jai jai ha ki sngi ban wan khnang ba watla ngi don ïa ka hok ban ïakhih jai jai, kam mut pat ba phin shim ïa ka aiñ hala ka jong ka kti. Khamtam ban shoh, pynjulor bad buh jingma ïa kiba lui lui-ka khubor ka dei ban leit sha baroh na ngi halor kane ka bynta” ula ong.
“Ka imlang sahlang ka dei ruh ban mih shisien ban kren halor kane ka bynta” ula bynrap.
Haba pynpaw ba ka Sorkar jong u ka long kaba kloi ban ïakren, u Myntri Rangbah ula maham ba ïa u laiñ ym dei ban tam.
“Ngi dei kawei na ka Sorkar kaba pdiang ïa baroh. Ngi la plie ïa ka jingkhang ban ïakren ïa kino kino ki mat. Hynrei u don u laiñ ba ngi hap ban buh bad ym don mano mano ruh ba lah ban tam. Kane ka dei ka khubor ïa baroh – sngewbha wat pyrshang ban leh ïa kata, bad lada don kiba leh, ngin hap ban leh eiei kat kum ka aiñ” ula ong.
Halor ka jingsngewkhia ïa ka jingwan ki nongjngohkai, u Conrad ula kubur ba ka jingthut ka suk ka saiñ ka ktah ïa ki paidbah hynrei ka Sorkar ka la shim mar mar ïa ki sienjam ban tehlakam bad ban wanrah biang ia ka shongsuk shongsaiñ.