Jur ka jingpahara ki pulit ha u Woh Kiang Nangbah, syrtap ki CRPF bad SOT sawdong ka Barik Point

Shillong, Nailar 24: Hadien ba la don ka jingthmu bad jingpynbna jong ka seng Khasi Students Union (KSU) ban pynlong ïa ka jingshong kyllaiñ myngor hakhmat jong u Mot Woh Kiang Nangbah kaba don ha Barik marpyrshah jong ka Civil Hospital Shillong ha ka sngi nyngkong naduh ka por 11 baje mynstep, na ka liang ki bor pynïaid district ki la dep ban pynbna da ka kyndon 163 BNS kaba khanglad ïa kane ka jingthmu jong ka KSU ban pynlong ïa kane ka prokram jingïakhih.
La ïohi ba naduh mynstep bad baroh shi sngi ki pulit ka nongbah Shillong ba kynthup ïa ki Special Operation Team (SOT), ki CRPF, bad kiwei kiwei ki pulit ki la ker kut sawdong ka jaka ba la pynïeng ïa utei u Mot ba shirynïeng jong u Woh Kiang Nangbah kaba la thmu ban pynlong ïa kane ka prokram kum ka dak ban dawa na ka sorkar ba kan mynjur ïa ki 5 tylli ki mat jingdawa jong ka KSU kaba la buh hakhmat ka sorkar bad kaba la aipor ruh haduh 15 sngi bad kaba la kutnoh ha kine ki sngi.
Bad dei hadien ba la kut katei ka jingai por ba ka KSU ka la sdang ban pynjur ki jingïakhih da kaba pynlong ïa ka Bike Rally ha ka 19 tarik ha kaba kane ka la wanrah ka jinghuri hura ha kaba la don ki briew kiba shim kabu ban pynkulmar bad pynjulor bad ktah kti ruh ïa ki briew kiba ïaid lynti.
Bad hadien katei ka prokram ka KSU ka la pynbna ruh ban pynlong ïa kane ka shong kyllaiñ myngor ha Khyndailad ha ka sngi Saitjaiñ ka 22 tarik hynrei na ka daw ka jingbym shah jong ki bor pynïaid distrik kane ruh ka la pulom noh bad ka KSU ka la pynbna ban pynlong biang ïa kane ka shong kyllaiñ myngor ha ka sngi nyngkong ka 24 tarik hynrei na ka jingbym ai jingbit jong u Deputy Commissioner bad ka jingkyrpad jong u ïa ka seng KSU kaba la paw lyngba ka shithi ba u la phah sha u Assistant General Secretary u Samla Pynshai Rani, bad kumjuh ruh ka jingpyrkhing bad pynjur jingpahara jong ki pulit ha katei ka jaka, la ïohi ba kane ka jingthmu ban pynlong ïa ka shong kyllaiñ myngor ka la kut noh khlem da la ïohi ban don kiba wan shim bynta.
Lah ban pynkynmaw ba ki 5 tylli ki mat kiba ka KSU ka la buh ka dei Pyndam noh ïa ka public hearing jong ka Shree Cement bad ban sospon ïa u Deputy Commissioner, bad u Superintendent ki pulit ka East Jaiñtia Hills bad ki ophisar ka MSPCB.
Ba ka sorkar kadei ban pynurlong noh ia ka Meghalaya Resident Safety and Security Act, 2016, nangta ban pynurlong noh ïa ka Meghalaya Indentification, Registration (Safety and Security) of Migrant Workers Act, 2020. Ban thungkam khambun ïa ki Khasi ha NEIGRIHMS katkum ka jingkular ba la ai. Ban wengnoh ïa ki Personal Interview na ki post Grade B, C, D kumba la bthah ka sorkar pdeng bad ban ym thep kam katba mon tang ïa ki briew lade.