Shillong, Jylliew 26: U Myntri Rangbah ka jylla Meghalaya, u Conrad K Sangma ha ka sngi Thohdieng u la leit ha ka jingïalang jong ka International Conference on Women Farmers and Sustainable Organic Agriculture kaba la long ha State Convention Hall, Shillong.
Ïa katei ka jingïalang kaba la pynïaid da ka tnad Agriculture bad Farmers’ Welfare, sorkar Meghalaya, ha ka jingïatreilang bad ka IFOAM – Organics Asia, kane ka jingïalang ka la don ki nongïashim bynta na ki riew paw khmat na ri India bad shabar ka Ri India, kynthup ïa ki nongmihkhmat na ka kynhun ba la tip kum ka KfW bad IFOAM, ryngkat ki nongthaw polisi, riew shemphang bad ki nongïoh jingmyntoi kiba dei na ka rep tynrai khlem dawai.
Haba kren shaphang kane ka jingïalang, u Myntri Rangbah, u Conrad K. Sangma, u la ban jur ba ka jingtrei shitom ka sorkar ban kyntiew bad pynlong nyngkong ïa ki nongrep halor bad ki rukom rep kiba neh.
U la pynpaw ba ha kine ki phra snem kiba la dep, ka sorkar jylla ka la trei shitom na ka bynta ban pynkhlaiñ ïa ka rep ka riang, da kaba buh ïa ki nongrep, khamtam eh ïa ki kynthei, hapdeng ka thong ka jingroi jingpar jong ka.
U Conrad u la ong ruh ba ka long ka kabu ksiar na ka bynta ki kynthei kiba ïoh ïa ka bhah ne ka bynta jong ki ïa ki jaka bad jaka rep namar ba la ïoh bynta da ka kynthei ha kane ka ai jait kmie ha ka jylla Meghalaya bad u la ong ba kane ka pynlong ïa ki ba kin long trai hi iaka jaka bad sumar ïa ka jaka rep bad kit khia ïa ka kam, ha kaba ki lah ban rep ban riang ruh.
U la ong ruh ba ki nuksa ki lah ban long ki nongmuna ba kordor na ka bynta ka aiñ rep jong ka pyrthei, khamtam ha kaban sngewthuh ïa ka jingïadei hapdeng ka jinglong trai ïa ka jaka, jingmih bad jingpynneh pynsah ïa ka khyndew.
U Conrad u la kren shaphang ka jingdonkam jong ki Khasi ha ka ban pynneh pynsah ïa ka sap rep ka riang naba ki Khasi ki im bad ka mariang bad ka mariang ka im bad ki bad ka riti ka dustur, khamtam ha ka jylla shatei lam mihngi, kaba la lah ban neh sah ka kolshor hyndai na ka bynta ki pateng ban wan.
U la pynpaw shai ba ka jingïasnoh kti ka long kaba donkam, kynthup ïa ka jingïadei lane jingtreilang kaba janai bad ka sorkar ne ki karkhana treikam shimet khlem da pynduh myntoi ïa kiwei.
Katba u Myntri ka tnad Agriculture & Farmers’ Welfare, u Timothy D. Shira, lem bad kiwei ki riew paw khmat la pdiang sngewbha ïa ki nongïashim bynta bad ong ba ka sorkar ka pynthymmai biang ïa ka jingkular ban pynkiew shakhmat ïa ka rep mariang bad ban kyntiew ïa ki kynti nongrep.
