Ka rep ka riang ba lamkhmat ki kynthei ha Meghalaya ka lah ban long ka mat wadbniah ka pyrthei: Conrad

Shillong, Jylliew 26: Ki Nongïalam, ki Nongthaw Policy, ki Nongwad Bniah bad ki Nongrep na kylleng ki ri ki la ïakynduh lang ha Nongbah Shillong ha ka sngi Thohdieng, ban ïashim bynta ha ka International Conference on Women Farmers and Sustainable Organic Agriculture, ban buh ïa ka jylla Meghalaya ha ka kyrdan kaba long pdeng jong ka jingïatai ha ka pyrthei ha ka kam rep kaba lamkhmat da ki kynthei, ka jingshngaiñ ha ka jingpynmih ïa ki marbam bad ka rep ka riang kaba ïai neh.
Ha kane ka jingïalang kaba ar sngi, kaba la pynlong da ka Department of Agriculture and Farmers’ Welfare jong ka Sorkar Meghalaya ryngkat ka jingïatreilang bad ka IFOAM – Organics Asia, ka long kum shi bynta ban rakhe ïa ka United Nations Year of the Woman Farmer 2026. Ki nongmihkhmat na ki kynhun bapher kum ka KfW bad IFOAM, ryngkat bad ki nongthaw ïa ki polisi treikam, ki riewstad bad kiba don bynta lang ha ka kam na ka liang ka jingpynmih ïa ki marrep ki bym ai dawai ki la wan ïashim bynta ha kane ka jingïalang.
Haba kren ha ka jingïalang plie kaba la long ha State Convention Hall, u Myntri Rangbah ka jylla u Conrad K. Sangma ula pynpaw ba ka jylla Meghalaya ka don ïa ka jinglong kaba kyrpang ha kaba ïadei bad ki kynthei, ha kaba ki kynthei ki don ïa ka bynta kaba khraw kum ki nongïada ïa ka khyndew ka shyiap bad ïa ka rep ka riang bad ula ong, ba ka jylla ka lah ban ai ïa ka nuksa kaba kongsan ïa kiba thaw ïa ki polisi treikam ha kaba ïadei bad ka kam rep kam riang ha ka pyrthei baroh kawei.
“Ka jinglongtrai ka pynlong ban don ïa ka jingkitkhlieh bad ïa ka jingpynneh pynsah” ong u Sangma bad ka bynrap ba ka jingmad jongka Meghalaya ka lah ban long kum ka bynta kaba lah ban pule bniah bha ha kaban sngewthuh ïa ka jingïadei hapdeng ki trai jaka, ka jingpynmih bad ia ka rep ka riang kaba ïai neh.
U Myntri Rangbah ula ong, ba ka jylla ka la pynlut ha kine ki 8 snem ha ka ban tei ïa ka jinglong jingman kaba ïadei bad ki nongrep bad ka kam rep kam riang, da kaba ban jur ha ka ban pynkup bor ïa ki kynthei, ban pynkhlaiñ ïa ki Self-Help Group bad ki kynhun jong ki nongrep bad ban kyntiew ïa ki jaka treikam jong ki shnong ki thaw.
Haba ban jur ïa ka jingkongsan ban pynneh pynsah ïa ka jingstad tynrai, u Sangma ula ong, ba kane ka dei kaba ïahap bha bad ka rukom leh ha ka rep ka riang tynrai bad ka jingpyndonkam ïa ki kor teknoloji kane ka juk ba mynta ban kyntiew ïa ka jingpynmih ha ryngkat bad ka jingïada ïa ka jingriewspah kaba la don naduh hyndai ha ka thaiñ.
Ula ïïalap ruh ïa ka jingdonkam ban peit ïa ka thaiñ shatei lam mihngi kum ka thaiñ jong ka jingdon ïa ka sawdong sawkun jong ka mei mariang bad ka kolshor ban kyntiew ïa ki sienjam kiba seisoh, ban khring ïa ka jingwan bei tyngka bad ban thaw ïa ki lad ki ban wanrah jingkylla ha ka pyrthei.
Ki nongpynïaid ki la kdew ba ki kynthei bad longkmie ki don ïa ka bynta kaba khraw ha kaba ïadei bad ka bor jong ka jingtrei ha ka kam rep kam riang hynrei ki la ïai bteng ban mad ban ïoh ïa ka jaka, pisa, kor teknoloji, ki ïew ki hat bad ha ka ban shim ïa ki rai kiba kongsan. Kane ka jingïalang ka thmu ban pyninam ïa ki sienjam kiba la seisoh bad ban pynkhlaiñ ïa ka jingkular ban pynkup bor ïa ki kynthei kiba dei ki nongrep.
Ka jingïalang ka la banjur ba ka Meghalaya ka la nang paw kum ka nongïalam ha ka rep ka riang kaba ïai neh bad ka bym pyndonkam dawai bad ka don ruh ïa ka lad ban pynlong ïa ki kynthei kum ki nongïalam kiba hakhmat na ka bynta ka jingseisoh ha ka thaiñ nongkyndong bad na ka bynta ka bha ka miat jong ka shnong ka thaw.
Kane ka jingïalang kan sa pynmih ruh ïa ka jingpynbna lang ne ka ‘Joint Declaration’ ban ïoh ïa ka jingithuh kaba ïar, jingkyrshan, jingbei tyngka ïa ki nongrep kynthei kum ki nongsynñiang kiba kongsan tam sha ka jingshngaiñ ha ka jingpynmih ïa ki marbam, ka jingkyrda ia ka jingkylla ka suiñbneng bad ka roi ka par kaba ïaineh.