SHILLONG, Nailar 24: Hadien ba ka Durand Cup Organising Committee ka la sdang ïa ka jingdie paidbah ïa ki ticket na bynta ka Semi final hapdeng ka Shillong Lajong FC bad ka NorthEast United FC ka ban long ha ka 26 tarik Nailar (Lah Sngi U Blei), la sakhi ba ki la don da ki hajar ngut ki paidbah khamtam ki khynnah samla kiba la wan lypa naduh dang step ban ïoh thied ïa ki ticket ha ki jaka ba la buh.
Kumba la pynbna, ka jingsdang die ticket (Offline Ticket) la plie hynnin ka Sngi Saitjaiñ naduh ka por 2 baje mynsngi, na Golf Link (Main Box office), Cafe Shillong ha Laimukrah bad ruh na Electronic Centre ha Police Bazar, hynrei naduh mynstep baroh lai tylli ki jaka die ïa ki ticket la shlei da u paibah, ha kaba don napdeng jong ki, ki la pep ruh na jaka trei tang ban ïoh thied ïa ka ticket semi final jong ka Durand Cup.
Ha kaba ïadei bad kane, na ka liang jong u Bah Seibor Sana-Club Advisor jong ka Shillong Lajong u la pynpaw ba ka Sorkar ka donkam ban pynheh shuh ïa ka madan bad ki jaka shong paidbah namar tang 14 hajar kam pat long satia ban pdiang ïa u paidbah u ba bun ba ieid ïa ka phutbol. U la ong ruh ba la kumno kumno 50 hajar ki jaka shong na bynta u paidbah ryngkat ka jingkyrpad ba ka sorkar ka dei ban leh kham kloi khnang ban pynhun ïa u paidbah ba ieid phutbol.
U la pynpaw ruh ba ha kaba ïa dei bad ka tiket ka klob kam lah ban leheiei namar kam shong ha ka jingpyniaid jong ki bad u la kyrpad ïa ki paidbah ki bym ïoh tiket ba kim dei ban duh mynsiem hynrei ki dei ban ai ka jingkyrshan ïa ka Shillong Lajong.
Lah ban kdew ba u bun na ki paidbha ba ieng laiñ kiba la ap naduh dang step ki la leit phai thylli namar tang hapoh shiteng kynta ki tiket ki la lut.
