SHILLONG, Nailar 24: Ka Meghalaya Boxing Association (MBA) ha ka Sngi Saitjaiñ ka la ïoh ban pynkupburom ïa lai ngut ki riew pawkhmat ha ka Boxing bad kiba la wanrah nam bad burom ïa ka jylla da ka kam ba ki trei.
Kine ki lai ngut ba ka MBA ka la pynkup burom ki kynthup ïa u Torak Kharpran,u ba trei ha SAl ha Arunachal Pradesh bad u ba la shah jied ban long u wei na ki Coach ka kynhun ïakura jong ka ri (Indian Boxing Coach) kaba la leit ïashimbynta ha ka Paris Olympic Games 2024 kaba la kut dang shen, nangta u Bah Larry Kharpran-Technical Director & Joint Secretary jong ka BFI bad u ba trei kum u Boxing Coach ha ka tnat Sports ka Sorkar jylla bad u ba la shah jied ban long kum u nongpeit pyrman lane “Observer” na ka Boxing Federation of India sha ka Paris Olympic Games 2024, kaba long ka nuksa babha sha kiwei pat.
Halor kane ka jingshah jied jong kine ar ngut ban don bynta ha ka kynhun ïakura ka ri sha ka Paris Olympic, ka MBA kam lah khlem da sngewsarong ha kaba ka la shim ïa ka kabu ban pynkup burom ïa ki ha ka Sngi Saitjaiñ, ha Shillong Press Club, Shillong.
Nalor u Torak Kharpran bad u Bah Larry Kharpran ka MBA ka la pynkupburom ruh ïa ka Priyanka Thapa kaba la wanrah nam hadien ba ka la khur takma na ka rynsan ïakura jong ka Sub Junior Boys & Girls National Boxing Championships kaba la long ha Greater Noida,Uttar Pradesh naduh 19 tarik haduh 25 tarik u Lber, 2024.
Ka jingpynkup burom jong ka MBA ïa kine ki lai ngut ka long ban ai mynsiem shuh shuh ïa ki ba kin nang kiew shuh ha ki kam ba ki trei bad ba kin nang pynïar ïa ka jingïalehkai boxing ha ka jylla bad ka ri hi baroh kawei.
Haba ai jingkren na ka liang jong u Toran Kharpran u la ai khublei ïa ka Meghalaya Boxing Association ryngkat ka jingkyrmen ba ka synjuk kan nang ïai bteng ban trei shitom ban kyntiew ïa ka Boxing hapoh ka jylla.
Na ka liang jong u Bah Larry Kharpran,
Ha kane ka sngila don ryngkatlang da u Bah Cornelius Kharhunai President MBA, Bah Daniel W Marbaniang-Treasurer MBA, Bah Dondor Marwein-Secretary MBA.
