SHILLONG, Nailar 24: Ka jingdie ïa ki ticket na bynta ka semi-final jong ka Durand Cup 2024 hapdeng ka Shillong Lajong FC bad ka North-East United FC ka ban sa long ha J.N. Stadium ha ka 26 tarik Nailar (Lah Sngi U Blei), ka la ïaid shakhmat ha kaba ka Sorkar jylla ka la don ktilang ban pynïaid da kaba pyndonkam da ki mashin.
ïa kine ki ticket na bynta katei ka jingïakhun la pyllait naduh hynnin ka sngi, ha kaba ka Phase 1 ticket, lyngba ka online la die lut plaiñ tang hapoh 6 minit. Ki jaka ba la pynkhreh ban die ïa ki ticket lyngba ka offline ha Laitumkhrah, Polo bad Police Bazaar ki la bteng ha ka Sngi Saitjaiñ ha kaba da ki hajar ngut ki briew ki la ap laiñ lypa naduh dang step ban ïoh thied ticket.
Namar ka jingbun palat u paidbah, ka sorkar ka la pynkhreh ruh sa kawei ka box office ha U Soso Tham Auditorium ban kyrshan ïa kane ka jingdie ticket. Na ka liang jong ka Ophis treikam jong u Deputy Commissioner, ka East Khasi Hills, ki magistrate ryngkat bad ki Pulit ki la ïatreilang bad ka Dorbar Shnongs jong kine ki jaka ba la pynkhreh ban pynïaid ryntih bad ban lait na kino kino ki jingkulmar hapdeng ki nongkyrshan kiba wan thied ticket, kiba la wan ap lypa naduh dang step.
Kumba ka long, ki ticket ba la mang ban die hynnin ka sngi Saitjaiñ (online bad offline) la die lut na ka bynta kane ka jingïakhun semi-final, kaba la pyndap pura ïa ka madan. Khnang ban pynhun ïa u paidbah u bym shym la ïoh ticket ban peit ïa kane ka jingïalehkai ha J.N. Stadium, Polo, na ka liang jong ka sorkar ka la pynkhreh da ki jaka peitkai lane ki Fan Parks, ban pynïeng da ki Giant Screen ha ka 26 tarik ha ki jaka bapher bapher ha ka nongbah jong ka jylla bad ha ki jaka bad ruh ha ki district headquarter. ïa kane ka jingïalehkai yn pyni ha kine ki jaka ba la pynkhreh na bynta ki nongkyrshan. Yn pyn byrnia ruh da ka jingpyni nam na ka Meghalaya Grassroots Music Program (MGMP) ryngkat ki jaka die bam ban sa kynthuplang ha kine ki jaka.
Kine ki jaka ba la pynkhreh ki long ha Mawlai Madan heh (stadium), R.V. Lyngdoh parking lot (mar pyrshah ïa ka golf ), Malki Ground , Umpling Maw-arling, Laitumkhrah Police Point Parking, NEHU campus.
La pynbna ruh ba yn plie biang ïa ka jingdie pyndep ïa ki ticket Online naduh ka por 10 baje mynstep mynta ka sngi, ka 25 tarik Nailar, kaba la pynsuk ha U Soso Tham Auditorium.
