SHILLONG, Nailar 24: Ka Madan S&CC ka la ïoh ban rah ïa ka namlahduh ha ka lympung ïalehkai phutbol jong ka Shillong Sports Association Under- 20 Fourth Division League 2024 hadien ba ka la pynliem noh ïa ka Umrynjah SC ha final ba la long ha ka Sngi Saitjaiñ (24 tarik Nailar) ha SSA Stadium, Polo.
Haba bishar ïa ka jingïalehkai, lah ban ong ba ka jingïakhun ka la long kaba itynnat bad kaba marïabiangbor, hynrei ka Madan S&CC ka la ïoh thep tam da 2 kol, katba ka Umrynjah Sports Club ka la ïoh ban thep tang shi kol (2-1).
Ka Madan S&CC ka la lamkhmat nyngkong ïa ka jingïalehkai lyngba ka kol na u Jason T Malsamtluanga ha ka minit ba 41, bad kane ka kynhun ka la nang pynskhem shuh shuh ïalade da kaba thep ïa ka kol kaba ar ha ka minit ba 48 na u Phermanbha Lyngdoh.
Na ka liang jong ka Umrynjah ka la ïakhun shitom ban pynphai ïa kine ki kol hynrei ka la shem jingeh namar ka liang pyrshah ka la kyrshan skhem ha bak mar ïa ïoh lamkhmat da 2 kol. Watla kata ruh, kane ka kynhun ka la ïohlad ban pynphai shi kol lyngba u Samborlang Jyrwa ha ka minute kaba 63.
Katkum ki kyndon jong ka SSA, baroh ar tylli, ka Madan S&CC bad ka Um Rynjah SC, kynthup bad ar tylli ki kynhun ba shah rem ha ka Semi final, ki la ïoh ban kyntiew kyrdan ïalade sha ka kyrdan ïakhun Third Division na bynta ka samoi ban wan jong u snem 2025.
Ha kane ka sngi la wan sakhilang ïa ka final da u Bah Banteidor Lyngdoh -President ka SSA, nangta u Bah B Diengdoh, Bah SS Rapthap ki ba long ki Secretary ba rim ka SSA, ki dkhot nongkitkam ka MFA lem bad kiwei kiwei.
