Ka sien ba nyngkong ha ki hospital sorkar ha NE pyndep ka NEIGRIHMS ïa ka jingpuid budlum

Shillong, Nailur 04 : Ka North Eastern Indira Gandhi Regional Institute of Health and Medical Sciences (NEIGRIHMS), Shillong, ka la lah ban pyndep ïa ka jingpuid budlum ne ka Unilateral Biportal Endoscopic (UBE) spine surgery kaba nyngkong, kaba dei ka rukom puid kaba rit na bynta ka lumbar disc prolapse.
Katkum ka kyrwoh na katei ka jaka sumar la ong ba ki ngeit ba kane ka dei ka UBE discectomy kaba nyngkong eh kaba la leh ha kawei ka hospital sorkar ha ka thain shatei lam-mihngi jong ka Ri. U nongpang uba la ïoh jingïarap u dei na Assam, u ba shitom na ka jingkynriah ki shyieng budlum ne ‘lumbar disc prolapse’.
Ym kum ha ka rukom puid budlum kaba ju leh barabor kaba donkam ban ot kham heh bad kham bun ka jingpang ïa ka dohksah kaba don sawdong la ong ba ha ka UBE ka pynsuk ïa ki doktor ba puid ban poi sha ka bynta kaba don ka jingshitom lyngba ki jingpuid kiba rit, da kaba pyndonkam ïa ka kor pynheh kaba pynheh ïa ka dur, khnang ban pyllait ïa ki thied ha katei ka bynta.
Shuh shuh ka NEIGRIHMS ka la ong ba kane ka rukom ka pynlong ban pynduna ïa ka jingbun ki jaka ba shah ot, bad ka pynduna ïa ka jingmynsaw ha ki dohksah, bad ka pynkoit kloi ïa u nongpang.
U Director jong ka NEIGRIHMS, Prof Nalin Mehta, u la ai jingïaroh ïa ka kynhun bad u la ong ba ka jingpyntreikam ïa ka UBE spine surgery ka dei ka jingkiew kaba kongsan ha ka jingdon lad ïa ki nongpang ban ïoh ïa ki spine surgery kiba khlem da pynjulor bun bad ki endoscopic spine surgery ha ka liang ki jaka ai jingshakri jong ka sorkar ha ka thain shatei lam-mihngi jong ka Ri.
“Ka long ruh ka lad ïa ki nongpang na kane ka thaiñ ban ïoh ïa ki jingshah puid budlum kaba thymmai, khlem da hap leit jngai na la ka shnong. Kane ka jingjop ka pynpaw ïa ki jingpyrshang ba bteng jong ka NEIGRIHMS ban wanrah ïa ki rukom puid katkum ka juk stad mynta kiba thymmai bad ban pynkhlaiñ ïa ki jaka sumar sha ki kyrdan kiba halor na bynta ki paidbah jong ka Northeast India,” la ong u Prof Mehta.
La lamkhmat ïa kane ka jingpuid da ka Department of Orthopaedics kaba la lamkhmat da u Dr. Sachlang Debbarma, ryngkat ka jingïarap na u Dr. Dinendra Chirom, Dr. Shanborlang, Dr. Ajoy Baishya bad Dr. Dasara Nongbet, Assistant Professor, Department of Anaesthesiology. Ka Nursing Officer Watila Chungmuro bad ka kynhun jong ka ki la ai ka jingïarap ha ka lïang ka jingsumar.
Ka jingpuid kaba la pyndep ha kane ka sngi ka dei hapoh ka jingpeit jong u Head of Department, Prof (Dr) Bhaskar Borgohain, ryngkat bad kiwei ki dkhot kiba rangbah jong ka department, kynthup ïa Prof (Dr) Sharat Agarwal bad Dr. Tashi G Khonglah.
Kane ka long katkum ka kyrwoh ba la phah da u Prof. (Dr.) Vikas Jagtap, Public Relations Officer jong ka NEIGRIHMS.