Yn sdang buddien noh ka KSU ïa ki 5 tylli ki mat ba la ïakren bad kular da ka sorkar

Shillong, Nailur 4 : Ka KSU CEC ha ka 4 tarik u Nailur 2026 ka la shong ïa ka jingïalang pyrkhat kam ha ophis treikam ka seng ban ïa kren halor ki mat ba la pynsgew sha ka sorkar bad ruh ban pyrkhat kumno ban bud dien ïa kiei ba ka sorkar ka la kular ha khmat ka seng ha ka jingïakren kaba long ha ka 26 tarik u Nailar 2026 ha Secretariat. Ha ka jingïalang ka CEC ka la rai ban iai bud dien ïa ki 5 tylli ki mat kiba ka sorkar ka la kular ha khmat ka seng ha kine ki taiew ban sa wan, bad kata ka long ban buddien khamtam ïa ka Falicitation Centre ha Umling bad Ratacherra bad ruh ka jingpyntreikam ïa ka Migrant Workmen Act kumba la ïa kut 20 sngi.
Ka seng ha kane ka jingïalang bad lyngba kane ka kyrwoh ka pynpaw ruh ïa ka jingsngew bitar halor ka jingshah thep case ki nongïalam ki jong ka kum ba jan man ka sngi bad khamtam ïa ka jingshah kem u Samla Samuel Kharbani uba long u GS ka KSU Shillong Mihngi Circle ha kaba ka jingshah khot ka jong u sha sardar PS ka dei na bynta ka jingpyrshah jur ka seng halor ka jingtei mandir beaiñ hapoh ka CBI ophis kaba long ka office sorkar bad jong u paidbah hynrei ka sorkar pat ka dung nadien ïa ki dkhot da kaba pharep klumar bad kem bad thep case ha ka jingjia ha ka jingïaid peaceful bike rally ka seng haka 19 tarik, kane ka pyni ba ka jingtlot bad ka jingbymler ka tnat pulit ba kim lah ban kem ïa kiba don kti hynrei ki shu kem klumar ïa ki dkhot ba ha khmat ka seng ban pynhun ïano re ïano khlem ki sabut ba biang ba ki leh ïa ka kam ba sniew. Halor ka jingshah khot hajir bad jingpyndik ka sorkar ïa ki dkhot ka seng ka seng ka buh ruh ïa ka jingkylli mynta ba haba ki pulit ki khot kumne bad pyndik kumne hato ka police department ka lah kem ne m tang uwei u briew uba pynjulor kali uba tih ïa ka surok paidbah bad uba don kti ha kane ka thombor ïa ki paidbah ba leit pyrshah ïa ka public hearing ha ka janmiet jong ka 30 bad step jong ka 31 tarik u Naitung ba long ka public hearing ka Shree cement ha lum syrman Elaka Nongkhlieh, haba ka aiñ ka dei ïa baroh bad ym don mano mano halor ka aiñ balei ka noh shiliang tang ïa ki dkhot ka seng ba tang ka sakhi sabut kim don hynrei ki kem naphang, kane ka pyni ba ka aiñ hi ka noh shiliang haduh katta katta ba wat hadein ar bnai ruh ka seng kam pat ïohi uwei ruh u ban shah kem ba leh ïa kane ka kam thombor ha ka public hearing. Halor kane ka seng kan nym shong kli kti bad ka ai ïa ka sorkar 3 sngi ban kem noh ïa kine ki briew ba don kti bad wat ïa ki briew sorkar ruh kiba lah ban don kti lym kumta ka seng kan hap ban pyrkhat da kiwei pat ki lad ki lynti hadien kane ka por ba la buh.
Ka seng da ka rai rangbah ba la shim mynta ka sngi ka la rai ban lada ym urlong kine ki jingdawa bad ba lada ka sorkar kam pyni dak pyni shin ïaki mat jingdawa kin treikam noh mar mar ka seng kam banse ban weng ïa ka temporary suspension ban ïakhih kumba la pynbna ha ka 26 tarik u bnai ba la dep bad kan bteng biang ïaki jingïakhih nangne sha khmat.
Ka KSU kan buddien bad peitngor ïa ki sienjam jong ka Sorkar halor kine ki mat ha kine ki sngi bad ka seng ka pynpaw biang ba ka jingïai sngap jong ka Union kam dei ka dak jong ka jingpdiang ïa ka jingpynslem. Ka Union ka la ai por ïa ka Sorkar ban pyni ïa ka jingtreikam bad ka jingpynbeit. Lada ka Sorkar kam ai ïa ki jubab kiba biang, kam pyni ïa ki sienjam kiba shai, ne ka bteng ban pynslem ïa ka jingpyntreikam ïa kine ki mat, ka KSU kan pynsdang biang ïa ki jingïakhih paidbah ha ka rukom kaba dei bad kaba paidbah.
Ka seng ka pynshai ba ka jingïakren ka don jingmut tang lada ka wanrah ïa ka jingtreikam. Ka jingïai ap jong ki paidbah bad ki samla jong ka jylla kam dei ban shim kum ka jingpdiang ïa ka jingbymtreikam jong ka Sorkar.
Ka Sorkar mynta ka dei ban jied: ka jingpyntreikam ïa ki mat jingdawa jong ki paidbah ne ka jingsdang biang ïa ka jingïakhih paidbah jong ka KSU.