Mynta u snem pat sha ka 84 % kiew kiba la lait ïa ka eksam MTET

Shillong, Nailur 04 : Ka result jong ka Meghalaya Teacher Eligibility Test (MTET) 2026 ka la pyni ïa ka jingnang kiew ka jingdon kiba pass bha mynta u snem lada nujor bad kiwei ki snem hadien ba ka jingdon kiba pyndep ïa kane ka eksam ka la palat sha ka 84 persen.
Ha ka result kaba la pynbna paidbah ha ka sngi Palei da ka Directorate of Educational Research & Training (DERT) ki pyni ba 84.30 persen ki kyrtong ki la pass ha Paper-I, bad 85.32 persen pat ha ka Paper-II.
La kdew ruh ba na ki 21,999 ngut ki kyrtong kiba la wan thoh ïa ka Paper-I, kaba dei na bynta ki klas I haduh V, ka jingdon kiba pass ka la kot sha ka 18,546 ngut. Katba ha ka Paper-II pat, kaba dei na bynta ki klas VI haduh VIII, ki la don haduh 18,672 ngut kiba pass na ki 21,884 ngut ki kyrtong ki thoh ïa ka eksam. Kane ka resutl ka pyni ïa ka jingnang kiew ka jingdon ki kyrtong kiba pass ïa kane ka eksam lada nujor bad u 2025, ha kaba ka percentage jong ka jingdon kiba pass ka long tang 63.15 persen ha ka Paper-I bad 64.43 persen ha ka Paper-II.
Ha kajuh ka por haba phai pat sha u snem 2023, ka jingdon kiba pass ka long tang 8.11 persen bad 9.27 persen.
Ka MTET, kaba la pynlong katkum ki kyndon jong ka NCTE, ka dei kaba donkam ban pass na bynta ban shah jied thungkam kum ki nonghikai ha ki skul elementary jong ki skul sorkar. Ïa kane ka eksam ka DERT ka la sdang naduh u snem 2019.
Haba ïadei bad kane ka result jong mynta u snem kaba dang shu pynbna shen, ka DERT ka la pynlong ïa ka eksamin ha ka 24 tarik Naitung ha ki 113 tylli ki jaka eksamin kiba don ha baroh ki district bad sub-division.
Ka Director jong ka DERT, Kong JU Kharpuri, ka la ong ba ïa ka eksamin la pynlong ha ka rukom kaba janai bha, kaba khuid bad kaba shai paidbah.
Ka la ong ba ka directorate ka la pynmih ïa ki MTET Guidebook 2026 na bynta baroh ar tylli ki paper, ryngkat bad ka YouTube tutorial kaba batai ïa ka rukom ban pyndap ïa ka OMR sheet, khnang ban ïarap ïa ki kyrtong, khamtam ïa ki nonghikai kiba dang trei kiba la don ha ka kam la bun snem.
Ka Kong Kharpuri ka la ong ba ka DERT ka thmu ban pynlong sa kumba lai tylli ki eksamin MTET — kiba la buh jingmut ban long ha Kyllalyngkot 2027, Nailur 2027 bad ruh ha u Lber 2028 — shuwa ka tarik ba la buh da ka Supreme Court, khnang ban ai sa kawei ka lad ïa kito kiba ym shym la lah ban pass.