Ka roi ka par ha Tura bad Jowai ka dei ban long kumjuh: JNC Western Zone

Jowai, Rymphang, 27: Mynta ka sngi ka 27 tarik u Rymphang 2024 ka Jaiñtia National Council JNC – Western Zone hapoh ka jingïalam u President bah Leo Ferdinand Dhar bad u General Secretary Bah Heibormi Lyngdoh kila leit jurip ïa ka jaka ban shna ïa ka Mini Secretariat ha Jowai bad ha kane ka jingleit jurip la shem ba la sdang ban shna noh ïa ka Mini Secretariat.
Kum ban shu pynkynmaw ba ha u bnai September 2023 ka seng ka la dep ban ïakynduh markhmat bad u Dy CM Sniawbhalang Dhar ban dawa shna noh ïa ka Mini Secretariat.
Ka seng ka ai khublei ïa ka Sorkar baka la shimkhia halor kane ka kam kaba long ruh ka shlem ai jingshakri kaba jan naka bynta ki nong Jaiñtia bad la kyrpad ruh ïa ka Sorkar ba ym dei ban ieh ka jingshna tang ha shiteng lynti hynrei dei ban pyndep kumba lah angnud da ki Paidbah.
Ka seng ka kyntu ruh ïa ka sorkar ba kumba la thmu ban shna ha Tura kumba la ong u Chief Minister ban wanrah kita ki large investment bad bun ki administrative reforms kumta thik dei ruh ban wanrah ha Jowai khnang ba kan nym long ka jingtheh shiliang ha ka liang ka roi ka par.
Ka seng kala ban jur ruh badei ban sdang noh ïa ka jingshna pyndep ïa ka Iawmusiang building complex namar ba wat ïa ka revised estimate ruh lah dep ban pynkhreh, namar ka dei ruh ka ïew bala shañiah bad ba bsa ruh ïa ki spah ngut ki nongdie haduh 600 tam bad kan wanrah hi ruh ïa ka jingmyntoi naka bynta ki Paidbah.
Khatduh ka seng ka kyntu ïa ka sorkar ba dei ban revised ne phai da kawei ka resolution ha ka jingïadei bad ka Smart Town ha Jowai namar ka jingïoh ka long kaba theh shiliang haba nujor bad ka Tura bad la kyrpad ïa ki nongmihkhmat ka Jaiñtia khamtam u local MLA ka Jowai u Wailadmiki Shylla ba u dei ban shimkhia halor kane ka bynta.