Mawkyrwat, Rymphang, 27: Ki nongrep synsar ha ki thaiñ 5 shnong ba kynthup ïa ka shnong Mawbidong, Manad, Pyndenlyngdoh, Pyndensohlang bad Mawbri kiba hap hapoh jong ka South West Khasi Hills District ha kine ki sngi ki la mat shibun ki jingeh tang namar ka jinghiar dor jong ki mar rep jong ki.
Na ka liang ki nongrep haba kren ha ki lad pathai khubor ki la pynpaw ka jingsngewsih bad ka jingsngewdiaw namar ka jinghiar kynsan jong ka dor u jong u synsar ha kaba ïa nujor ki snem ba la dep namar ka dor ka long T. 150/- tam shi kilo hynrei ha une u snem 2024 pat ka dor u synsar ka poi tang T. 30/- tyngka shi kilo bad wat haduh T. 40 tyngka bad kane ka wanrah shisha ka jingduhnong kba khraw ïa ki nongrep bad ki don ruh ki nongrep kiba la pynpaw ba kim kwah shuh wat tang ban leit lum ïa ki synsar na ki jaka rep ki jong ki.
“Ngi sa ong kumtei namar ki jaka rep jong ki jngai na ka shnong bad ba ki hap ban ïaid kjat haduh 2 kynta ei ei ym tang katta, ngi hap ban ai bylla sngi ruh ha ki briew kata naduh por ba pynkhuid, por kheit haduh ka kit ka bah ha ki lynti kiba eh, kat haduh ba kin da poi ha ki jaka ban thew ban ïoh ban die ïa u synsar haba kheiñ ïa ki jinglut baroh ka la long shisha ka jingduhnong kaba khraw, ngi hap ruh ban buria ban sei na la ka jong ka pla ban siew ïa ki bai bylla baroh bad ngi khlem ïoh ei ei shuh katkum ka dor u synsar mynta u snem”, la pynpaw ki nongrep.
Kum ki nongrep kim hap ban ieh sha khlaw ïa u synsar kim sngewdon jingmyntoi ei ei shuh ban leit lum leit lang ïa ki mar rep bad wat kiba ki la dep ban lum ha ïing ha sem ruh ki la duh jingkyrmen ban pynïaid ïew ïa u synsar jong ki, ïa kane ka pynpaw da u bah Phranstarwell Khyllem Kharai, u bah Sandarlin Khyllem Kharai, u bah Thonding Jyrwa kiba dei ki nongrep na kane ka thaiñ jong ka shnong Pyndenlyngdoh.
Ha kaba ïa dei bad ka jingithuh jong ka sorkar ïa u synsar kum u mar rep, ki nongrep haba kren ha ki nongthoh khubor ki pynpaw ba ban kyntiew ïa ki nongrep ha ka ïoh ka kot, ka kamai kajih jong ki nongrep kum ha kane ka rukom kam don jingmut shisha namar lada phai ha une u snem ba mynta ki ïa kynduh ki jingeh shibun tang namar ba hiar dor u mar rep jong ki. “Bun na ngi, ngi shaniah ïa ki kam pynbiang ha ïing ha sem ha ka rep ka riang kum kaba ban phah skul ïa ki khun la ha shnong bad shabar ki shnong, hynrei haba ka long kumne ka dor ka mur ngi mat jingeh shibun”, ki la pynpaw bad ka jingthmu jongki ban phah pyndep ïa ki khun ki kti ha ki kyrdan bapher bapher katkum kane ka juk ba mynta ymtang kan nym poi shuh sha ka thong.
Namarkata, kum ki nongrep ki da buh ka jingkyrpad ïa ka sorkar lyngba ka tnad ba dei peit ïa ki rep ka riang ba kin thaw ki lad thaw lynti ban pynneh ïa ka dor jong ki mar rep kumba long ha ki snem ba la leit kham tam ïa u synsar namar kiba bun hi ki shaniah ha une mar rep bad ïa baroh ki jingdonkam ha ïing ha sem, watla ki don kiwei ki mar rep kum u sohmarit, bad u sla tyrpad khnang ba ki nongrep kin ym mad ia ka jingduhnong kaba khraw hadien ba ki la theh ia ka sye ka syar ban rep baroh saw aiom.
