Dang bteng ki briew na Assam ban tih shyiap beaiñ ha ka wah Umïam ha ka shnong Amphreng
Watla ujor u trai jaka bad ka KSU sha u DC ka Ri Bhoi
Nongpoh, Rymphang 27: Ka jingtih shyiap beaiñ na ka wan Umïam ba hap ha u pud u sam ka Shnong Amphreng ha Ri Bhoi District ka la dang ïaid bteng haduh kine ki sngi, kaba dei wat hadien ba ka KSU Umden Circle bad u trai jaka ki la dep ban ujor sha u Deputy Commissioner ka Ri Bhoi ban tuklar halor ka jingtih shyiap na katei ka wah umïam kaba don hapdeng u pud u sam ka Meghalaya bad ka Assam.
Kum ban pynkynmaw, u trai jaka bad uba dei ruh u Rangbah Shnong ka Shnong Amphreng, u Bah Minus Sakra ryngkat ka KSU ki la dep ban ujor sha u deputy commissioner ka Ri Bhoi ban dawa tuklar bad ba dei ban phah sangeh ïa ka jingtih shyiap beaiñ ha ka wah Umïam, hynrei kumba ka ioh lum jingtip ki briew na Assam kim salia bad ki dang ïai bteng ban tih ïa u shyiap na katei ka wah.
Kumba la lap ruh da ka KSU dang shen ha ka jingleit jurip, ki briew na Assam ki la wan kyntur pud ruh sha u pud u sam ka Meghalaya ba hap ha katei ka wah Umïam bad kaba ktah shuh shuh ïa ka jingjot ka wah ka dei kaba ki la pyndonkam da ki kor puh shilum ban tih shyiap na katei ka wah.
Haba buddien ïa kane ka jingtih shyiap ki briew na Assam ha katei ka wah Umïam ba hap ha u pud u sam ka Shnong Amphreng ha ki thaiñ khappud, la ong ba ka jingtih shyiap ka la long shaba palat ban pynjot ïa katei ka wah, namar ki briew ki la pyndonkam da ki kor ki bor naduh ki kor puh shilum bad ki trok ban kit shyiap na katei ka wah, kaba dei kawei na ka wah kaba don ha khappud ka Meghalaya bad ka Assam.
Haba ioh ban ïa kren mynta ka sngi bad u trai jaka bad uba dei ruh u Rangbah Shnong ka Amphreng, u Bah Minus Sakra u la ong ba ki briew na Assam haduh kine ki sngi ki dang bteng ban tih shyiap ha katei ka wah, wat la ki bor ba dei peit na ka tnad Forest ki la wan ban jurip ïa katei ka jingtih shyiap ha ka wah Umïam.
Shuh shuh, u la ong ruh haduh kine ki sngi ki briew na Assam ki dang pyndonkam da ki kor puhshilum ban tih shyiap ha katei ka wah bad nalor kata ym tang ba ki pynjot ïa katei ka wah bad ki la wan kyntur pud ruh sha shilang ka wah ba la hap ha u pud u sam ka Meghalaya da kaba tih jubor ïa u syiap bad ruh ban shna lynti ïa ka um da kaba pynïaid na ka jaka ba la hap sha Meghalaya, u la bynrap.