Khot ka NAWWA ban ïakhun pyrshah ïa ka HIV/AIDS bad u drok

Nongpoh, Rymphang, 27: Ka Nongpoh Area Women Welfare Association (NAWWA) kum kawei na ka kynhun ki Seng Longkmie ha Ri Bhoi ki la mih shakhmat ban pynpaw ïa ka jingsngewkhia kaba jur halor ka jingkynrei u drok bad ruh ka jingpang ñiangkulia (HIV/AIDS) ba la donkam ban don ka jingïatrei lang na ka bynta ban tehlakam ban pynduna ïa ka jingkynrei u drok bad ruh katei ka jingpang ñiangkulia ha Ri Bhoi bad wat ha ka jylla hi baroh kawei.
Kum ban pynkynmaw, ka tnad ka koit ka khiah ha Ri Bhoi lyngba ka Meghalaya Control AIDS Society dang shen ki la pyntip paidbah ba ha Ri Bhoi District ki la don haduh 536 ngut kiba la shah ktah ha ka jingpang ñiangkulia, ha kaba kane ka la buh jingkylli ïa kiba bun balang bad ruh ka jingma lada ym lah ban shim ïa ki lad ban ïada na ka jingpud sted katei ka jaid jingpang.
Haba ïa kren bad ki Nongthoh Khubor, ka Kong Meristela Lamare, President ka Nongpoh Area Women Welfare Association ka la ong ba kane ka kynhun ki Longkmie ha Nongpoh ka dap da ka jingsngewkhia ha kaba ym dei tang ka jingpur sted u jingpang ñiangkulia ha Ri Bhoi bad u drok ruh u la rung ha manla ki shnong ba la donkam ban don noh kata ka jingtehlakam ha kaba pynduna ïa kane ka jaid jingpang bad ruh ïa ka jingkynrei jong u drok.
Ka la ong ba ka NAWWA na ka por sha ka por ka la ju pynlong ïa ki jingai jinghikai halor ki lad jingïada na ka jingpang HIV/AIDS bad ruh ka jingktah jong u drok ïa ki khun samla ha kane ka juk ba mynta, hynrei lada ym don hi kata ka jingïatrei lang ka long kaba eh ban pynduhjaid ïa u drok bad ruh ïa katei ka jaid jignpang kaba bit sha kiwei tang ki kam shongkha pathar khlem jingïada bad ruh ka jingpyndonkam ban dih drok da kab pyndonkam da ujuh u thyrnia.