Jowai, Rymphang, 27: Ïa ka jaka ot doh (masi bad shniang) kaba la tip kum ka ‘Modern Bi-Species Abattoir’ Demthring West Jaiñtia Hills District ïa kaba la dep plie paidbah da u bah A.L. Hek (MLA) uba dei ruh u myntri ka tnad AH & Veterinary ha ka 19 tarik u Nohprah 2023, ka la sdang treikam mynta ka sngi 27 tarik u Rymphang da kaba ai ka jinghikai ïa ki nongot doh.
Kane ka rukom ot doh katkum ka juk ba thymmai la leh mynta ka sngi da ki nongot doh, ha ryngkat ka jingdonlang ki doctor na ka tnad Veterinary West Jaiñtia Hills, ki nongïalam ka seng nong ot doh ka Jaiñtia Livestock Butcher Welfare Association (JLBWA) bad ki dkhot ka Khasi Jaintia Butcher Welfare Association, Shillong kila la wan khnang ban ai jinghikai kyrpang ïa ka rukom ot doh hapoh kane ka ïing ot doh kaba don ha Demthring.
Naka liang ka Dr. Weimanhi Tyngkan ba dei khmih kum ka Mobile Veterinary Dispensary Amlarem kala ïathuh kum ki doctor na ka tnad Veterinary kin wan jurip shwa ïa ka jinglong jingman bad ka koit ka khiah jong ki mrad (masi bad sniang) hashwa ban ot doh ïa ki.
Kum ki doctor kin peit ruh naduh ka jingïaid jingïeng jong ki mrad, ki jingmih jong ki ummad na ki khmat bad ki khmut bad ka jingshit ha ka met, hadien ba ki mrad ki long kiba khoit ka khiah la shah ban ot doh ïa ki hapoh kane ka jaka.
Shuh shuh kala ong hadien ba la dep ot doh, kin sa leh sa ka post mortem kata ban jurip bniah ïa ki dohjem kum ki klong snam, ki khyllai bad lada ym shem lap kino kino ki jingpang ka jingot ïa ka doh kan ïaid beit shakhmat haduh ban da pynïaid ïew ïa ka doh.
Kala pyntip na ka liang ki Doctor jong ka tnad Veterinary kin don beit manla ka por ba ot ïa ka doh ha kane ka jaka khnang ban ïoh jurip shwa ïa ka koit ba khiah jong ki mrad.
Na ka liang ki nongïalam ka seng die doh ka Jaiñtia Livestock Butcher Welfare Association kata naduh u President ma Limba Dkhar, u Vice President ma Livis Pyrtuh bad u Secretary ma D. Ryngkhlem kila pynpaw ka jingsngewnguh kaba khraw eh ïa ka sorkar kala la wanrah ïa kum kane ka projek ot doh kaba long katkum ka juk ba mynta.
Kiba pynsngew ka jingdon jong kane ka jak ot doh hapoh ka West Jaiñtia Hills District kan ïarap shibun eh ban pynkloi ïa ka rukom ot doh haka jingkhuid jingsuba, da ka jingkyrmen skhem ba ïoh pynpoi ïa ka doh sha ki paidbah nongbam haka rukom kaba khuid ba suba.
U President ka Khasi Jaintia Butcher Welfare Association bah Generos Warlarpih ha ka jingkren sha ki lad pathai shubor ula pynsngew kum ka kynhun kaba la shimti da ka sorkar ban pynïaid ïa ka jaka ot doh ha Shillong, mynta ka sngi kila wan khnang sha kane ka jaka ha Demtriang ban ai jinghikai ïa ki nong ot doh katkum ka juh ba mynta.
Ula ong kane ka jaka ka long kaba biang eh ban ot doh ym kumba long ha ki por mynshwa kaba ïapher nadong shadong, u kyrmen lyngba kane ka jaka ot doh ki paidbah kin ïoh ban bam ïa ka doh kaba biang tam, namar ym shem la ïoh shuh ban ot katba mon ïa ki mrad da ka jingdonlang ki Doctor.
Ha kane ka sngi la donlang naduh SDBO ka Amlarem ma G. L Niang, u Executive Engineer Veterinary Jowai bah K. Mawlong nalor kiwei kiwei de.
Ïa kane ka jaka ot doh jong ka tnad Animal Husbandry & Veterinary, ka sorkar jylla la pyntrei da ka Chennai Abattoir Pvt. Ltd. & Rishan Rapsang, kaba la bei pisa da ka sorkar kmie haka jingkot kaba T.7.83 klur tyngka. Ha kane ka jaka lah ban ot kumba 50 tylli ki Masi bad 100 tylli ki Sniang haka shi sngi.
