Ka PM-KISAN: ka jingkylla ka ïoh ka kot ha ki jaka nongkyndong jong ka India

New Delhi, Jylliew 29 : Ka Skhim Pradhan Mantri Kisan Samman Nidhi (PM-KISAN), kaba la sdang da ka Sorkar India ha u Rymphang 2019, kadei kaba la saindur ban ai jingkyrshan ha ka kamai kajih beit beit sha ki nongrep ha kylleng ka ri; bad ka la long ka bynta kaba kongsan ban kyntiew ïa ki kam rep bad pynthikna ka jingskhem ka ïoh ka kot jong ki briew ha ki jaka nongkyndong. Kane ka sienjam ka thmu ban kyntiew ïa ka kamai kajih jong ki nongrep da kaba phah pisa beit beit sha ki, kaba la kyntiew ïa ka kamai kajih ha ki jaka nongkyndong.
La sdang na Gorakhpur, Uttar Pradesh, ka skhim PM-KISAN ka thmu ban ai jingkyrshan ïa ki jingdonkam pisa jong ki nongrep kiba don jaka. Lyngba ka jingmyntoi kaba T. 6,000 shi snem ba la sam ha ki lai sien siew, ka skhim ka la ïarap ïa ki nongrep ban siew ïa ki jinglut jingsep ba ïadei bad ki kam rep bad lait na ka jinghap shaniah ha ki nongai ram.
Kane ka jingkyrshan pisa ka la dei kaba la wanrah jingkylla, kaba la ïarap ïa ki nongrep ban pynlut ha ki tiar, ki symbai, ki sboh, ki dawai pynïap khniang bad kiwei kiwei ki jingdonkam ba ïadei bad ka rep ka riang, bad lyngba kane ka la kyntiew ka jingmih ki mar rep bad ka jingïaineh.
Naduh ba la sdang ia ka, ka PM-KISAN ka la siew palat T. 3.02 lak klur sha palat 11 klur ngut ki nongrep, kaba la long u mawmer ba kongsan ha ka kam rep jong ka ri lyngba ki bynta jingsiew ba 16 hapoh ka skhim. Shuh shuh, ka bynta jingsiew ba dang shen kaba 17, kaba la kot haduh T. 20,000 klur ka la pynkhlain ïa ka ïoh ka kot ha ki jaka nongkyndong, bad ka jingsiew baroh ka la long palat T. 3.24 lak klur. Ka jingktah ka ïoh ka kot na ka skhim bad ka jingktah ïa ka ïoh ka kot ha ki jaka nongkyndong ka la long kaba kongsan.
Ka jingwad bniah jong ka International Food Policy Research Institute (IFPRI) ka la lap ba ki nongïoh jingmyntoi jong ka PM-KISAN ha Uttar Pradesh ki la ïoh ïa ka pisa baroh khlem kino kino ki jingjah pisa, kaba la kyntiew ïa ka jinglah ban bei tyngka ha ka rep ka riang. Kane ka jingwan jong palat T. 3.24 lak klur sha ka ïoh ka kot ha ki jaka nongkyndong ym tangba ka la kyntiew ïa ka jingskhem ka kamai kajih jong ki nongrep hynrei ka la kyrshan ïa ki iew bad ki kam ai jingshakri ha ka thain.
Ka PM-KISAN ka la paw namar ka jingpynïasoh bad ka Information and Communication Teknoloji (ICT) ban pynseisoh. Ka skhim ka la pyntreikam ïa ka sienjam Direct Benefit Transfer (DBT) ban pynthikna ka jingryntih, jinglong shai, bad ka jingsiew pisa ha ka por sha ki bank account jong ki nongrep. La ïarap ïa kane ka sienjam da ka jingpynïasoh bad ka Aadhaar, Public Financial Management System (PFMS), bad ka National Payments Corporation of India (NPCI), kaba la pynduna ïa ka jingshah thok bad pynthikna ba ki jingmyntoi ki poi sha ki briew kiba dei hok ban ïoh.
Ka rynsan PM-KISAN, kaba la sdang kyrpang na ka bynta kane ka skhim, ka pynïasoh ïa ki data point bapher bapher ban pynthikna ïa ki nongïoh jingmyntoi, pynthikna ba ki nongrep ki ïoh ïa ki jingmyntoi. Shuh shuh, ka jingpynshisha lyngba ka Aadhaar kalong kaba kongsan, ban kyntiew shuh shuh ïa ka jinglong shai bad jinglah treikam.
Ban ïarap ïa ki nongïoh jingmyntoi, ka skhim PM-KISAN ka kynthup katto katne ki sienjam ba saindur thymmai ban ai jingkyrshan. Ka web portal ba kyrpang, ka mobile application bad ki SMS ki ïarap ïa ki nongrep ban buddien ïa ka jinglong jingman, ka jingpyndep e-KYC bad ka jingweng ïa ki jingeh. Ka “Know Your Status” (KYS) module ka ïarap ïa ki nongrep ba kin peit ïa ka jingkyntiew kyrteng jong ki bad ki lad ba ki lah ban shim. Kane ka la pynkupbor ïa ki nongrep ban ïoh jingtip ha ka por bad pynduna ka jinghap shaniah ha kiwei kiwei.
Shuh shuh, ka jingsdang ïa ka Kisan e-Mitra, ka AI-powered chatbot, ka la pynkylla ïa ka jingkyrshan na ka bynta ki nongrep, lyngba ka jingai jingiarap ha 11 tylli ki ktien. Kane ka jingshakri, ryngkat bad ka jingïatreilang jong palat 5 laktylli ki Common Service Centre (CSC) bad ka Indian Post Payments Bank (IPPB), ka wanrah ïa ki jingshakri ba ïadei bad ka skhim ha ki tyngkong iing jong ki nongrep, da kaba pynthikna ïa ka jingkynthup lang ïa baroh.
Ka lynti shakhmat :
Ka Sorkar India ka bteng ban pynbha bad pynïar ïa ka skhim PM-KISAN. Kum shi bynta jong ka Viksit Bharat SankalpYatra, ka campaign ha kylleng ka ri ka thmu ban kynthup ïa baroh ki nongrep, bad palat 1 klur ki nongrep ki la ïoh ïa ki jingmyntoi. Ka jingïai ai jingmut lyngba ka Kisan Call Centre bad ki jingleit jurip sha ki jaka ka pynthikna ba ka skhim ka kylla ban pyndep ïa ki jingdonkam jong ki nongïoh jingmyntoi jong ka.
Ka lad ban weng ïa ki jingeh jong ka skhim, bad ka jingpynbeit ïa kine kaba la jan poi 99% ka pyni ïa ka jingkut jingmut jong ka ban weng mar mar ïa ki jingeh jong ki nongrep. Ki nodal officer ha ki shnong ki thaw ki ai jingkyrshan, kaba la kyntiew shuh shuh ïa ka jinglah treikam jong ka skhim.
Katba ka PM-KISAN kan jam sha kawei pat ka bynta, ka jingphaikhmat ka neh halor ka jingpynthikna ba man ki nongrep ki ïoh ïa ka jingmyntoi na kane ka skhim. Lyngba ka jingkyrshan pisa jong ka, ka jingïasohlang ka teknoloji, bad ka jingsaindur thymmai, ka PM-KISAN ka pynkhreh ban long ka nongrim ba kongsan jong ka jingkiew ki kam rep ha India bad ka jingkiew ki jaka nongkyndong, da kaba kyntiew ïa ki nongrep kiba lah ban kyrshan ïalade bad ruh kiba riewspah.
Ka jingpynïasoh ïa ka PM-KISAN bad ki sienjam jong ka Sorkar India ha ka Digital Public Infrastructure (DPI) da ka jingpyndonkam ïa ka Artificial Intelligence kan pynkhlain shuh shuh ka jingjop jong ka skhim.