Shillong, Naitung 13 : U Myntri Rangbah ka Jylla Conrad K Sangma mynta ka sngi Palei ula ong ba ka Office Memorandum (OM) kaba la dep pynmih ban pyntreikam ïa ka Roster System ka dei ka rai kaba khatduh bad yn ym phai dien shuh.
U Myntri Rangbah haba ïakren bad ki nongthoh khubor ula ong ba ka jingkylli ban phadien biang ïa ka Roster kan ym mih shuh.
U Conrad ula jubab ïa kane halor ka jingkylli kaba ïadei bad ka jingshong shah jingit ba khlem pud jong ka ACHIK ban dawa ïa ka Sorkar ban pyntreikam ïa ka Roster System naduh ki snem ba la leit noh bad ban wanrah ïa ka Winter Capital ha Tura, West Garo Hills District.
“Ka (OM) ka dei kaba la rai khadduh bad ka jingkylli ban phaidien biang ïa ka, kan ym mih shuh” ong u Conrad haba pynkynmaw ba ka Sorkar Jylla kala dep ban ïasyllok bad baroh ki kynhun bapher bapher shuwa ban wanrah ia kane ka OM ba thymmai.
Kat kum ka jingong jong u, ka ACHIK ruh ka la ïadonlang ha kane ka jingïalang.
“(Hynrei), kaei kaba kongsan ka long ban pynthikna ba ka Roster System ka dei ïa ka ban pyntreikam bha kumba ka long ha ki sngi , bnai bad snem ban sa wan bad kane ka long kaba kongsan ïa ngi bad kane ka dei kaba ngi khmih lynti” ula ong.
U Myntri Rangbah ula ong ba ka Sorkar kam lah satia ban weng noh ia ki briew kiba dei na kiwei pat ki jaidbynriew hadien bala dep thungkam ia ki namar kane kam iahap bad kam long hi ruh.
Halor ka jingdawa ïa ka Winter Capital, u Conrad ula ong ba kane ka dei ka jingdawa kaba la slem bha bad kine baroh ki dei kiba don jingïadei bad ka ïoh ka kot.
“Nga la kren naduh ka sngi ba nyngkong ba baroh ki jingdawa kiba wan ha kane ka bynta ki dei kiba don jingïadei bad ka ïoh ka kot bad ki katto katne ki jaidbynriew ha ka imlang sahlang ki sngew ba da ka jingïoh ïa ka Winter Capital, ka roi ka par kan wan. Kumta,ka dei kawei na ki lynti ba la khmih lynti ïa ka jingwan ka roi ka par ha ki kitei ki bynta jong ka thaiñ” ula ong.
Haba pynpaw ba ka Sorkar ka la pynthikna ba ki kam pynroi ki la poi ha baroh kawei ka Jylla, u Myntri Rangbah ula ong ba ha ka sien ba nyngkong eh, ka Sorkar ka la buh ïa ki Mini Secretariat ha ki thaiñ bapher bapher jong ka Jylla ba kynthup ïa ka Tura, Jowai bad Pynursla.
